اكمل لكم باقى الحكاية
ولسه هأرد عليها … ردت قبلى السينارسيت وقالت اعمال حبيبتى مش نص كم .. دي بكم .. وبعدين الحكاية باختصار ” قيراط حظ .. ولا فدان شطارة ” .. قلت لا انا مش هاسمع للمحبطين .. ولازم اتحرك .. دي ” الحركة بركة ” .. لقيت الناقدة بكل هدوء بتقول لى هدى نفسك شوية ” كل تاخيره .. وفيها خيرة ” .. قلت لها انا لازم اسمع كلام السينارسيت .. واخرج عشان … الاقيها قطعت كلامى وقالت لي ” من خرج من داره .. اتقل مقداره ” .. قلت لها انا لازم اروح عند صاحبتى عشان اشوف اختها .. يمكن تكون عروسة لزميلى … و
” يابخت من وفق راسين فى الحلال … الناقدة المستفزة قالت : يا شيخة ده انت احسن لك ” تمشى فى جوازة ولا تمشى فى جنازة ” .. لكن السينارسيت النعنوشة قالت اياكى تسمعى كلامها .. “اعملى الخير وارميه فى البحر ” .. واذ فجأة ترد الناقدة تقول لى : مهما تعملى خير مش هتلاقي غير نكران الجميل . ده ” اخرة المعروف الضرب بالكفوف ” .. وقالت اقول لك بلاش تروحى كلميها فى التليفون احسن .. وزى المثل ما بيقول ” ابعد حبة تزيد محبة ” … السينارسيت ردت عليها …وقالت بس المثل بيقول ” البعيد عن العين بعيد عن القلب “… لقيت نفسى مش هاخلص من الاتنين … فتحت الباب وخرجت … وهما ملازمنى … جنبى بتاع حلويات … قلت ادخل اجيب علبة شيكولاته ادخل بيها على صاحبتى … فتحت المحفظة وباشوف الفلوس اللى معايا اخبارها ايه … بصراحة السينارسيت اديتنى حبة شجاعة وكرم وقالت يا ستى ماتحسيبهاش ” اصرفى ما فى الجيب يأتيكى ما فى الغيب ” .. اقتنعت بكلامها … ولسه هأدخل المحل … الاقى الناقدة خطفت منى الشنطة … وقالت اياكى تسمعى كلام السفيهه المبذرة دى … وقالت يا بنتى ” القرش الابيض ينفع فى اليوم الاسود ” .. انا الوقت بقيت فى حيرة اسمع كلام مين فيهم … ده كله والسيناريست بتشد الشنطة من الناقدة عشان تديهالى … لقيت نفسى مقتنعه انى اجيب حاجه حلوة من المحل .. لكن الناقدة رفضت رفض تام واخدت الشنطة وجريت وبقيت اجرى وراها فى الشارع انا والسيناريست وكل الناس بقت بتجري معانا عايزين يعرفوا احنا بنجرى ليه .. وسمعت اتنين بيجروا معانا .. واحد منهم بيقول للتاني اجرى بسرعة نخطف الشنطة اللى هناك دى .. قال له ياعم اسكت بقى اجرى ويتقطع نفسى عشان شنطة شكل صاحبتها ” نص كم ” هى وشنطتها .. يا اخى ” ان عشقت اعشق قمر وان سرقت اسرق جمل ” رد عليه وقال له يا باى ده ” الطمع قل ماجمع ” وأنا والسيناريست قررنا ….اكمل لكم فى االحدوتة الجاية .. احنا قررنا ايه ..
اشوفكم علي خير في حكاية ” نص كم ” !
