شروط الحب اسكت هس
نسمع بس ….ونحافظ علي المسافات
ولو كان الحبيب شاعر
وعاوز وقت يلضم نصه ف المساحات
نسيب له براح
ونفرش له الورق أرواح
نهش الكدب من حواليه
ولو كان فيه حتت ضلمة نرش صباح
دا لو كان الجدع شاعر !!
وعاوز يمسك اللحظة وينفخ فيها لانفعالات
وعاوز يطلع المعني يجيب منه وجع وآهات
وعاوز يخفض الجناحات لأم الكلمة ترضي عليه
ويقعد بين ايدين الحب ويبوسه مابين عينيه
دا لو شاعر
وعاوز ينتفض ثورة ف بيجمَّع حروف ضالة
ولما نتفق يالله
يقوم من تحت كوبري الشعر ويلم الكلام يداديه
يقول يسقط ويحدف طوب علي الأحزان
ويرمي كمان علي الناس اللي ناقصة جنان
يقول يحيا ويجري يخترق ضاحية نسيها زمان
وينكش بين عيون الناس يلم الباقي م الإنسان
وعاوز ينفرش ضلة
وعاوز ينبدر غلة
ويبقي استثنا بالجملة لحد ماتنتهي بإلا فيبقي الحب له وعليه
دا لو شاعر…. وحب يموت..بيكره كلمة استني
قبور الشعر دي جنة
َمفيش لا دموع ولا جنازات
ولا هدوم سودا ولا معني مالوش عبارات
قبور الشعر خالية عذاب ولو يعني الوجع قارح.. بيبقي عتاب
وكل ما ماتت الشعرا بيبقوا شباب
لكن مين ينفع انه يموت
دي منزلة عاوزة بحر سكوت
مفيش شاعر يعيش علي طول
دا يوم ميت ويوم بيقول ويوم ف النار بيتنعم ويوم ف الجنة بيعاني كسل وخمول
ويوم مقتول ومش عارفين سبب قتله
ويوم تلاقيه بيندب حظه وكأن الوجع مات له
ويوم مسجون
وانا عاشق من النوع اللي مش مضمون
احبك واعشقك واكتب كتابي عليكي وارمي يمين طلاق بائن واكون شاهد واكون مأذون
ومن ضمن اتزان الشعر شرط أساسي
يكتبه حد مش موزون
