اوعى تضيع عمرك خايف من كلام الناس
خاف مل عمر اللي بيجري بيك
ومش باديك
دة الشيب سرح في شعرك
والوجع في عضام رجليك
خاف من نفسك اللي هتبقى ف يوم
غريبة عليك
لكن الناس؟!
الناس لو حزين هيطبطبوا عليك ويمشوا
ولو قلتلهم عللي حقيقي قاهرك هيكّشوا
ولو مكسور هيلملموا كسرك
والازاز المكسور هيجرحوا بيه كفك
ويتفننوا ازاي يفتوا ويلوموا فيك ويغشوا
ولو قدامهم بكيت…
هيبصوا ف دموعك ويسيبوك ويمشوا
جمع يا صاحبي كل الناس
اللي مستنية الغلطة منك
وقدامهم اغلطها… او متغلطهاش مش فارقة
طب اقولك كلمة في سرك
هم أصلا عينهم مش شايفة شيء منك
واللي عامل فيها حبيبك
حكى على غلطة مطلعتش أصلا منك
واللي طبّله واللي زمرله مهنش عليه يفهم منك
فيلعن أبو الناس وعيش…
عيش أيام متتنسيش…
عيش أيام لما ترجع تبص عليها متندمش
ولما ترجع تبص ف وشوشهم متقرفش
ولا اقرف! حقك!
المهم لما تبص يوم في المراية
تحترم نفسك لنهاية الحكاية!
