الجزء الاول
بورما….
عارفينها….!!!
أيون…. بورما اللي الجماعة صدعوا دماغ أبونا بيها من ييجي خمس سنين …
وانقذوا المسلمين اللي بيندبحوا فيها…. واا إسلاامااه
وإلى الجهاااد…..و سلامة وإنتي فين يا جهااد
أهو ربنا كرم بورما دي من وسع… لا بجد كرمها آخر كرم والله
والناس هناك إشتغلوا على نفسهم وتعبوا وشقيوا ووصلوا للمركز الاول ف العالم…
مممم لا مش في الصناعة حضرتك…!!
ولا ف التعليم والله….!!
ولا حتى ف الزراعة…. !!!
لا إستنى… هما فعلا اخدوا المركز الأول في العالم ف الزراعة ….!!
بس في زراعة وإنتاج الإفيون
الخبر بيقولك إن بورما ولأول مرة ف التاريخ تنتزع المركز الأول في العالم في إنتاج مخدر الإفيون على مستوى العالم بعد ما وصل إنتاجها السنادي لألف طن إفيون وبكدا هي عدت إنتاج افغانستان بتلات مرات…
شوفتوا بقا إزاي الناس دي تعبت وإشتغلت على نفسها لحد ما وصلت للمركز الاول في العالم …
طول عمري بقول إن الإسلاميين او أقصد المتأسلمين لما بيهيجوا على تريند بيكون التريند ده مشموم
علشان كدا ديما الإسلاميين بيكرهوا الجيش…. علشان هو الوحيد اللي فاهم دماغهم ومخطاطتهم اللي هو ديما مش عايزين لا دولة ولا نظام
هما أكل عيشهم ع الفوضى …
وع الناحية التانية من الكوكب….
فنزويلا…
واللي ميعرفش فنزويلا دي فين ف فنزويلا في قارة امريكا الجنوبية وجنبها البرازيل…
فنزويلا بقا بتحشد قواتها على الحدود وامريكا بتحشد قواتها والبرازيل بتحشد قواتها وغويانا بتحشد قواتها…!!
وشكلها هتقوم حرب عالمية هناك…!!
هييجي واحد ويسألني ويقولي …
الله … ومال امريكا ومال فنزويلا…!!
وبعدين هي امريكا بتحشد قواتها فين؟؟
دي ملهاش حدود ف امريكا الجنوبية
انتي هتجننينا معاكي ولا ايه!!
وحرب عالمية ليه ؟؟
دي شكلها حرب ع الديق كدا ومتكبريش المواضيع ….
دي مصارين البطن بتتخانق عادي يعني
هفهمك يا سيدي …
إقليم غويانا دا كان جزء من فنزويلا وعمل إستفتاء شعبي للإنفصال…
شوف اول ما تسمع كلمة إستفتاء شعبي وإنفصال ف اي حتة في العالم يبقا لازم تفهم ان اللي وراه امريكا ولازم تفهم ان امريكا مبتعملش حاجة لوجه الله …. مهي امريكا مبتوزعش سبح قدام الجامع يعني ..؟
إقليم غويانا دا إقليم غني بالنفط
كدا انت فهمت ليه امريكا هايجة عليه…!!
امريكا بقا حشدت قواتها في الإقليم قال إيه علشان ولمؤاخذة الديموقراطية…!!
بس فنزويلا مسكتتش وراحت حشدت قواتها على حدود الإقليم علشان تضمه ..
وراحت البرازيل اللي على الحدود معاهم حشدت قواتها…
مين بقا اللي واقف في ضهر فنزويلا وبيحشد معاها ضد امريكا…!!!
أيون…. شاطر
فنزويلا وفي ضهرها الصين وروسيا وإيران
اه والله
وكله مستني طلقة واحدة تخرج بالغلط من اي حد فيهم وهتبقى درمغة
مش بقولك هتبقا حرب عالمية هناك …
وع الناحية التانية من الكوكب…
السعودية….
هو الخبر يمكن غريب شوية على ناس كتير …
بس لما تعرف إن السعودية بتطلب قرض دولي ب ١١ مليار دولار علشان تستكمل بيه مشروعات … دا يبقا إحنا هنا في مصر نعمل تمثال لعبد الفتاح السيسي على باب مطار القاهرة والله ..!؟
علشان اللي جاي مصر واللي خارج من مصر يعرف اننا عايشين ببركة ربنا وبمجهود الراجل ده
إقنعني أنت…. إزاي السعودية اللي عندها أنهار البترول دي كلها ومزنوقة في قرض ب١١ مليار دولار
اه نسيت اقولكوا ان في عجز في الموازنة العامة للسعودية ٢٠٢٤ ب ٧٥ مليار ريال …؟؟
يعني السعودية في الموازنة الجديدة اصلا هتستدين ب ٧٥ مليار ريال علشان تكمل بس موازنة السنة الجاية..!!؟
خد بالك… هييجي اليوم اللي نسأل فيه نفسنا هو إزاي عبدالفتاح السيسي جاب الفلوس دي كلها اللي عمل بيها كل المشاريع اللي في البلد دي منين
لو إنت فاكر ان ال١٦٠ مليار دولار ديون مصر هما اللي عملوا المشاريع دي كلها تبقا اهبل؟؟
المشاريع اللي إتعملت في مصر دي لحد دلوقتي إتكلفت ترليونات…. أيون احنا دخلنا ف الترليون اللي هو ألف مليار حضرتك علشان يخليها قد الدنيا ..
وع الناحية التانية من الكوكب…
أمريكا….
هي الطيارات الأمريكية ملهاش اهل يسألوا عنها…!!
طيارة F16 وقعت إمبارح وهي في مهمة تدريبية ف كوريا الجنوبية
والبنتاحون طلع بيان وقال ….
العين صابتنا ورب العرش نجانا والحمد لله قدرنا ننقذ الطيار بس الطيارة انفجرت
خد بالك دا تاني حادث في خلال اسبوع
قبلها كان طيارة في اليابان ومات ٨ وقبلها كان طيارة في النرويج وقبلها كان طيارة ف استراليا
طب ده ملفتش نظر الأمريكان لحاجة …!!!
قالك لا إحنا محسودين وهنبخر الطيارات قبل ما تطلع وهنكتب عليها عضة أسد ولا نظرة حسد
كمان ف امريكا….
البنك الفيدرالي هيجتمع النهاردة وربنا يستر وميرفعش الفايدة علشان هو بيرفع من هنا والكوكب كله بيترفع من هنا
بس الكلام كله انه هيثبت الفايدة
كمان ف امريكا….
الحج بايدن طلع وخطب في الامريكان وقالهم…
رشحوني لفترة جديدة علشان بإذن واحد أحد ومنغير مقاطعة سنة ٢٠٢٨ هعملكم قطار فائق السرعة….. اه والله قال كدا
الراجل اللي اسمه بايدن ده تقريبا بيغش من نفس خطط السيسي للتنمية والله..
بس عايز اقولك ياعم بايدن ان السيسي خلاص خلص القطار فائق السرعة اللي هيلف مصر كلها في ساعتين زمن
أنا بقول لاخونا البعدا ما تروحوا لبايدن وقولوله ان القطار ده ملهوش جدوى إقتصادية زي ما بتقولوا كدا عندنا..؟
وع الناحية التانية من الكوكب…
روسيا…
وفي عز ما طيارات امريكا بتقع في كل حتة…!!
المعلم بوتين بيدشن لأكبر غواصتين نوويتين في الكوكب كله
انا مش عارفة الراجل ده ناوي يعمل ايه في الكوكب بصراحة…!!
كل ما يصحى من النوم علشان يخش الحمام يروح يدشن حاجة نووية يا صاروخ يا غواصة يا طيارة
يا عم بوتين ما براحة علينا…!!
كمان في كوكب روسيا…
الاسبوع اللي فات بوتين عمل جولة ف الخليج
وتقريبا كدا راح طرقع للسعودية وللإمارات وقالهم بالمفتشر كدا…
المتغطي بالأمريكان عريا
