بقينا اليومين دول بنسمع عن كتير من الرياضيين وغيرهم من الشباب الصغيرين بيموتوا فجأة،
وبعد التشريح بعد الموت بيلاقوا أن سبب الوفاة هو المرض دا.
طب إيه حكايته بقي؟
اعتلال عضلة القلب التضخمي HOCM
بص ياسيدي،
القلب عبارة عن أربع حجرات للتبسيط اتنين فوق ودول اسمهم الأذينين “واحد يمين وواحد شمال” وبيفصل بينهم حيطة أو حاجز Septum,
وحجرتين تحت أكبر في الحجم وأقوى “واحدة شمال —ودي أهم حجرة لأنها اللي بتضخ الدم لجسمك كله عن طريق الأورطي—
وواحدة يمين بتضخ الدم للرئتين علشان الدم يتحط عليه أكسجين.
بين الحجرتين دول حيطة أو حاجز محترمة كدا هيا دي السبب في المشكلة دي IV septum.
في المرض دا بيبقي الجزء العلوي من الحيطة اللي قلتلك عليها بيبقي متضخم وكبير لدرجة انها بتضيق فتحة الأورطي اللي بيدي الدم لجسمك كله.
ليه كبرت كدا منعرفش بالظبط بس لقوا أن الموضوع دا ٥٠٪ من حالاته عندهم حد في العيلة عنده نفس المرض يعني وراثة Familial والباقي شيطاني كدا sporadic due to genetic mutation.
لما يجي الشخص ده يلعب رياضة جامد..
القلب عمال ينقبض جامد..
والانسداد بتاع الاورطي عمال يزيد..
وكمان الدم اللي رايح للشرايين التاجية Coronaries اللي بتغذي القلب هيقل يعني أثناء المجهود عضلة قلبه مش هيوصلها أكسجين كويس، ودا ممكن يدخله في عدم انتظام شديد في ضربات القلب كافي أنه يموته في لحظتها.
فيه مبدأ كدا بيقول أن عضلة القلب اللي مش واصلها أكسجين كويس بتبقي غضبانة بأبسط طرق التعبير يعني. “A myocardium deprived of oxygen is an irritable myocardium”.
تشخيص المرض دا بيتم عن طريق الإيكو Echocardiography.
وأفضل علاج ليه أن احنا نقطع الحتة اللي كبرت في الفاصل بين البطين الأيمن والأيسر Surgical myectomy .
