أنت ليه بتفشل فى إختيار الناس الصح ؟؟

أولاً : لأن الناس الصح بدأوا يبعدوا وينعزلوا عن الناس الفترة دى وكمان بدأوا يتجنّبوا التعامل مع الغير وطبعاً هما معذورين لأنهم فقدوا المِصداقية فى اللى حواليهم ..

ثانيا : أنت اتعوّدت تغفر للناس الغلط وتفوّت موقف ورا التانى وفضلت تسامح كتير وتتحمّل فوق طاقتك وهمّا بيلعبوا معاك لعبة ” اللاّ مُبالاة ” ..

ثالثاً : أنت اتعوّدت تضّحى وتيجى على نفسك في سبيل إرضاء الشخص الغلط اللى هو إتعوّد منّك على العطاء فأنت خلّيته محطوط فى خانة ” الأنانية ” بدون ما تقصد ..

رابعاً : التنازلات الكتير مِنّك طمّعت فيك الناس الغلط اللى دايماً بيكونوا فى حالة تأهب وإنتظار لتنازلاتك ..
وطبيعي الناس الصح مش بتطمع فى أى تنازلات لأنّهم بيكونوا ولاد أصول قوى وكبريائهم وتربيتهم بتمنعهم إنّهم يفكّروا يستنزفوك وحط ألف خط وخط تحت كلمة ” يستنزفوك ” لأن الإستنزاف ده أنت اللى بتسمح بيه من البداية مع الشخص الغلط ..

خامساً : ودى الأهم طِيبتك الزيادة أحياناً بتكون سبب فى بلاءك بسبب ثقتك اللى بترميها على أى حدّ لمجرّد إنه فتح لك شبابيكه والشبابيك هنا غير البيبان على فكرة
يعنى ممكن تثق في حد ويفضل بالنسبة لك كتاب مقفول ووقتها هتحسّ بالندم إنك منحته الثقة دى بمنتهى السهولة وهو يطلع مش قد الثقة فهيخليك تندم أكتر من الأول .