(الزيتون القديم)
(جزء من نصوح السبعينات)(بيومى الغفير – على رفا ـ الحذاء الفضى ـ أنور بشاميل ـإبراهيم الطله ـ فكرى العطار ـ طه القهوجى ـ ثابت تريكو)
** مش حيعرف الكلام اللى حأكتبه ده أى واحد إلا إذا كان عمره فوق الخمسه وأربعين سنه لإن اللى حأوصفه دلوقت هو جزء من شارع نصوح حتى نهاية السبعينات
** ياترى الناس فاكره إن مطعم العائلات الشهير اللى موجود الآن فى ميدان الحلميه اصلا كان موجود فى الممر فى شارع نصوح
كان فيه (ممرين) الممر الأول كان فيه مطعم العائلات وجنب منه محل عمى (مصطفى حسان للتطريز) والقهوه القديمه اللى كان بيتجمع عليها كل أصحاب المحلات وعمى فتحى وأحلى قهوه تشربها من إيده وعمى كامل القهوجى ودورة المياه اللى كانت بتخدم كل محلات الزيتون
أما الممر التانى كان فيه محل أخذية الحذاء الفضى بتاع عمى طه (الله يرحمه) ومش عارف ليه كان مسميه (الفضى مش الذهبى ) ومين ينسى عمى ( أنور بشامل) والناس أطلقت عليه لقب (بشامل) من كتر كلامه وأكله للمكرونه بالبشامل
ومصنع التريكو بتاع عمى ( ثابت)و عمى (إبراهيم الطله) اللى كان بيطلى قشرة الدهب ومحلين الأحذيه واحد بتاع عمى (سليمان) والتانى بتاع عمى (حسن) والله يرحم الجميع
** ومن علامات نصوح القديم عمى (على) ومحل الرفا بتاعه الشهير وإبنه عمى (محمد) وهو مازال فاتح محل (رفا) فى سيدنا الحسين وماشاء الله عليه إيده تتلف فى حرير وعمى (محمد) الترزى الفنان ولا يمكن ننسى عمى (فكرى) العطار
** عمى (أحمد) كان الوحيد اللى فاتح محل (أكل) كان بيقدم وجبات وكان مشهور بهذه الوجبه (ربع فرخه وأرز وسلطه وفاصوليا بيضاء) وكمان كان بيعمل وجبة (سمك) والوجبه كان ثمنها (2 جنيه) وكان ممكن تاكل بأقل من كده حسب طلبك
** ومن علامات الممر أيضا عمى (محمد) اللى كان بيصلح الراديو والتليفزيونات وكان معلم فى مهنته وعمى (عبده) أول واحد جاب عربية (1100) على الزيرو وكانت عربيه صيحه وتلاقى كانت قيمتها بالكتير ( 500) جنيه ولا حاجه
بس ياخساره اللى مش فاكر إسمه (مصور المياه) اللى كان واقف بمكنة تصوير عند المزلقان وكل المحلات دى كان بيحرسها عمى (بيومى) الغفير واللى كان مشهور بصوته الأجش العالى
** طبعاً الناس دى كلها الآن فى ذمة الله فرحمة الله عليهم أجمعين كانوا ناس طيبين ومحترمين وكل واحد فيهم كان أستاذ فى مهنته
(ذكرى رقم 191)
محمود عزب البحراوى
