الرقص تحت مظلة فلسفة ثقافية ..أو عملية أشبه برقص حفلات الزار ..تفريغ للطاقات المكبوتة ..في الزار الرقص في عالم الجن والعفاريت والسحر والأعمال ،أما في فرقة شخلعة بما لها من هلفطة الغطاء الثقافي..الحرية في التعبير عن النفس وإطلاق المشاعر المكبوتة ،وكله كوم واحنا شعب راقص كوم ،أيوه راقص كما الطير يرقص من الألم على الخزعبلات الثقافية ..وارقصي يللي ما أنت غرمانة.
*مي عامر :لحد دلوقتي أنا مش عارفة قيم الأسرة المصرية فين.
*غادة كمال: شخلعة هي تجربة ضد الخوف من المجتمع ووصمة الرقص،وحصار الجسد.
وهنا نطالع سويا خلاصة الفيديو التي نشرته DARAJ Media معهما
مي عامر (باحثة في الانثروبولوجيا الثقافية مؤسسة فرقة شخلعة لمساعدة السيدات في التعبير عن أنفسهن ومشاعرهن ):
احنا أجسادنا شايلة ذكريات كتير قوي ،حمل ،ولادة،عنف،وحاجات لطيفة ،وطبيعي إننا نبقى بنرقص بسوتنا وكروشنا ،احنا مش في مسابقة إغراء،ولافي مسابقة رياضة بدنية ،احنا بنرقص،بنرقص ليه ،علشان عايزين ننبسط، وفي خلال ال ٣…٤ سنين اللي فاتت دول حصل كذا حادثة بدأوا بالدكتورة منى البرنس،وفتاة الفستان الأزرق ، وبعدين فتاة المنصورة وأخيرا البنت اللي رقصت في حفلة التخرج في أسيوط، والله مؤلم جدا لأنه لو تقري عن الفن ده وتشوفي أد إيه اتطور واحنا بنسافر ووبنروح ،وبنيجي دول أوروبية بنشوف فنون أبسط من كده بكتير بيتعملها مهرجانات،وليالي، وصعب قوي إن فن زي ده يتم وصمه وكده،احنا شعب بنرقص،احنا بنرقص طول الوقت،احنا لوجالك أي خبر حلو أي حاجة هتعمليها هتشغلي مزيكا وترقصي،تحاول مي من خلال فرقتها معالجة الصورة النمطية المسيئة عن الرقص البلدي،ودفعه بعيدا عن منظور الإغواء، كما تعالج فكرة عدم تقبل الراقصة إلا بالجسد الممشوق.،نفس مساحة التغطية والتعرية اللي بتتقبل من راقصة الباليه مابتتقبلش أبدا من الرقص البلدي،في حاجة ياجماعة احنا بنحكي حكاية غير التغطية والتعرية والإغراء،يعني أنا لحد دلوقتي مش عارفة قيم الأسرة المصرية فين ، يعني علشان احنا ستات مع بعض فاحنا جوه القيم ولابره القيم ،أنا مش قادرة أفهم قوي،اللفظ لفظ غير محدد.
غادة كمال كاتبة وفنانة تشكيلية
أول خناقة ليا مع بابايا وأنا عمري تسع سنين إن أنا كنت عايزة أطلع رقاصة ،ليه مش دكتورة ،فكرة التعامل مع الرقص بشكل فيه إدانة كبيرة دي حاجة لازم تتغير ،والحاجات لما بتتغير بتتغير من تحت مش من فوق، تغيير وجهة نظر المتلقي للرقص الشرقي هتغير وجهة نظره في جسد المرأة،وهيغير وجهة نظرة في تعامله مع المرأة،يعني أنا بأشوف إنها من تحت قوي،شخلعة هي تجربة ضد الخوف من المجتمع، ووصمة الرقص،وفتح مساحة آمنة أمام النساء، ضد حصار أجسادهن
