تالين

ياهدية رب العالمين
أد إيه ليكي
محتاجين ومشتاقين
تضحكي تفرح السنين
تبكي نضحك زعلانين
حتى وهى مكشرة
تلاقيها حتة سكرة
لوزة مقشرة
وردة مزهرة
وف ثانية
تقلب الدنيا
بإبتسامة زي الشمس
منورة
ونطلب منها نظرة
تقول يحنن
وتزن وتفنن
وتصرخ
قال إيه .. بتسنن
ياناس حتى صرختها
بتجنن
ولما يضيق بينا الحال
نجري على صورتها
في الحال
تضحك وشوشنا
ولا شيء يحوشنا
وتتبدل الأحوال
حبيبة أبوها
الكل حبوها
روح أمها
وفرحة عمرها
قلب خالتها
أد إيه حبيتها
وأخواتها طايرين بيها
ليل نهار
وأولادي زهقوا
من طول الانتظار
عايزين يبوسوها
في خدها القطن
ويفضلوا يشيلوها
ومن حضن لحضن
وأقوللهم صوروها
وأبعتولي قوام
عايز أشوف صورتها
قبل ما أنام
يمكن أشوفها في الأحلام
ونفضل منتظرين
طلتها ونظرتها
اللي فيها كل الأماني
بالآمال والأمان
وفرحة الدنيا تاني
وضحكة الزمان ..