الانتخابات قربت مش زى امتحانات المدارس ممكن قرب الامتحانات تلحق نفسك وتشد شويه فى المذاكرة المهم تنجح والسلام
الانتخابات لا ياحبيبى دى علم وجذور واصول وقواعد وممارسة وتجارب شفتوا قد ايه الانتخابات صعبه وتحتاج مجهود سابق ولاحق مجهود قديم ومستمر ودائم تحتاج قواعد شعبية فى البلاد دائمة من الخرسانة المسلحة المدعمة بحديد خمسة لينية مش قواعد من الحمرة والجير لا تشيل ابراج ولا حتى ثلاث ادوار
وكل راجل او ست عندهما كرامة قبل ما يفكر يدخل اى انتخابات يفكر صح ويحسبها صح ده اذا كان عايز يحافظ على اسمة وكرامتة ومحدش يقولى حق دستورى نعم حق ولكن بالاصول والحساب يافرحتى مرشح سابق او مرشح ساقط عيب ايوه عيب مش السقوط لا عدم المنافسة عدم الصمود اما السقوط بعد منافسة قوية وفاعلية كبيرة مش عيب بل شرف لمن حاول وجد واجتهد بالاصول وكان له وجود ومعركة انتخابية حقيقية
مش كل واحد ربنا رزقه بقرشين واصبح ينال لقب الثرى او المليونير وكان من قبل من الفقراء ينفع يدخل انتخابات الا فى القوائم التى تباع باغلى الاسعار فيفقد المرشح قيمتة وكرامتة ويشترى بامواله كرسى البرلمان ويركب ويدلدل رجلية وممكن يتف على الناس لانه بفلوسى ياكلاب
مش كل واحد شغل منصب واتفصل ولا استقال ولا طردوه يطلع يرمى همومة وعيوبه علينا ويترشح فى الانتخابات ويقرفنا واللى بيدى نفسه رتب عسكرية ولا لقب معالى الوزير ولا يقولك وكيل وزارة من دماغة ماهو مفيش حد بيحاسب حد
مش كل واحد يرمى نفسة فى حضن حزب وينافق ويجرى ويدفع ويدلع ويطبطب وكل ما يعمل حاجة يقولك بتوجيهات فلان او علان ولا فلان نافع ولا علان شافع وكان معرفش ايه نفع نفسه
مش كل واحد يتصور بجانب البية المحافظ او معالى الوزير ويجرى ويتحشر ويتخانق ويضحك علشان الصورة تطلع حلوه وكان يريد ان يهتف للناس شفتونى مع الوزير او المحافظ وطبعا دى خيابه وهيافة لا يصلح صاحبها ان يمثلنا فى البرلمانات
مش كل واحد يعرف لجان حكومية نازلة قرية يجرى ويقابلهم ويفرض نفسة عليهم دون مراعاة لكرامة منصب او عظمة كرسى البرلمان ويتسول الخدمة ويعلن انه هو اللى جابها للناس وكان الحكومة لا لها خطط ولا انجازات
ايها المليونير من حقك تدفع وتترشح وتبقى سيادة النائب لكن من حقنا كناخبين اننا نسال حضرتك انت مين لامؤاخذه تاريخك ايه وكنت ايه واتغيرت ازاى بالحلال ولا بالحرام انتى بتشتغلى ايه على راى مارى منيب سبت شغلك ليه مفصول ولا مرفود ولا مستقيل وليه ياسيادة من يريد الترشح لا تكذب ولا تتجمل ولا تتصور ولا تنسب لنفسك ما فعله غيرك مش من حقك من حقك نافق وطبطب وامسح جوخ وبوس ايادى الباشا والبيه وادفع واتبرع وادخل القائمة بس هقولك من الاخر انت متنفعش نائب تمثلنا ولا تعبر عنا ولا تحقق ما نريد لان ما تم شرائه بالفلوس بينداس بالاقدام
الانتخابات جذور واصول وقواعد وتجارب وخدمات متواصلة على مدار سنوات وسنوات واى حاجه غير كده تبقى طفرات والطفرات لا تدوم ولكن تندثر فى اقرب الاوقات وعندنا تجارب كثيرة واللى ميعرفهاش يسالنى وانا هرد عليه
اتصوروا واضحكوا علشان الصورة تطلع حلوة امام الكاميرات لكن امام الناس انتم عارفين انتم ايه
عايزين نواب تمثلنا وتحقق طموحتنا لاننا فعلا تعبنا مش عايزين دلاديل ولا طراطير ولا امعات ولا تقبيل الايادى وتقديم فروض الطاعة والولاء عيب عليكم انتم هتبقوا نواب
مش كده ولا ايه
