جلست فى حوار وصراع مع نفسى كالعادة حينما انشغل بحدث او عمل او فعل تسالنى نفسى واجيب واسالها فترد وهى اضمن من الحوار مع اى حد كان فى هذه الايام لان على راى المثل لو فيه واحد بيحب فيه عشرة بيكرهوا
سالت نفسى هروح الانتخابات لمجلس الشيوخ ولا مش هروح واخذت النفس وانا نتبارى فى الراى لا مش هروح هقاطع الانتخابات ليه يانفسى احتجاجا على نظام انتخابى غير عادل وغير منصف ويعتبر فرض ناس علينا بالقوة الانتخابية واهمال راى الناخبين اللى هو احنا وعدم اختيارهم ممثليهم زى ما هم عايزين طيب ياست نفسى مافيه طريقة تانية نعبر بها عن سخطنا وعدم رضانا على هذا النموذج الانتخابى المتعمد عايز تقول ايه ياصاحبى بقول لحضرتك يانفسى انا ضد السلبية من زمان مش من النهاردة طيب ما نروح انا وانتى معايا طبعا للجنة الانتخاب ونشارك وندعم العملية الانتخابية ونبطل الصوت احتجاجا على رفضنا لنظام الانتخابات ده ازاى يعنى يبقى عملنا ايه مادام ذهبنا المشرع المبجل اللى عمل النظام ده هيفضح الدنيا ويعتبر نفسه نجح وهيهتف ويقول نسبة الحضور عاليه وغير مسبوقة لا يا نفسى انتى مش واخده بال حضرتك ان ارتفاع نسبة الاصوات الباطلة هتبقى وصمة عار على النظام الانتخابى وهتعتبر رفض له مع عدم السلبية يبقى نروح ونبطل صوتنا ونخرج نمارس حقنا الدستورى وبلاش نضيعة لانه امانة هنحاسب عليه والسلبية شئ مرفوض بصراحه
طيب ماشى هتروح تبطل صوتك ومعاك غيرك وكده كده القائمة هتنجح والفردى المرافق هينجحوا وسلملى على الانتخابات يعنى لا انا ولا انت لينا اى لازمة نروح ليه خلينى وراك لما اشوف اخرتها معاك يانفسى لازم نؤدى دورنا ومنقفش مكتوفى الايدى نمصمص شفايفنا ونقول مقاطعة زى غيرنا ياستى نروح وننتخب المرشحين ولادنا اللى اترشحوا مستقلين واخذوا موقف ايجابى كده صح انا معاك نروح وننتخب المستقلين يمكن ربنا ينفخ فى صورة حد منهم وينجح ويبقى عملنا حاجه واخذنا موقف ايجابى مع انى اشك والله العظيم
من الاخر ياصاحبى انا مكنتش هروح معاك اللجنة وكنت هتروح من غير نفسك لكن هاجى معاك ننتخب المستقلين ونشطب على القائمة ونرفضها يبقى كده انا وانت طبقنا النظام الفردى اللى كلنا عايزينه
شكرا يانفسى اتحملتينى وربنا يعينك عليا وعلى افكارى تعبك معايا معلش امال اروح لمين مليش الا انتى اللى استامنها على فكرى وسرى وقرارى
مش كده ولا ايه
