ابني قال لي
ف يوم
لاعبني
بنج بونج
قلت أخ
اتكشفنا
قال لي مالك
فين عزيمتك
فين تاريخك
وانته أدي
قلت بخ
حط كورة
و راح مسرفس
شوطة منه
و شوطة مني
هوب طخ
المضارب طايرة
حايرة
و الكور بترخ رخ
هيلا هوبا
و شاطها طلقة
ف ونج رايت
ونج لفت
و قام مسنتر
جون صاروخ
خلاني أدوخ
هوب تاني
و هوب تالت
قلت لأه
الواد شكله
نصبلي فخ
اشتبكنا مرة تانية
تاك و تك
ترك تك
و اتلاقيتني
بشوط و أرد
أضرب و أصد
و هو متلخبط
و حايس
كانه نخ
اتعادلنا
قال لي كمل
اتفردت و سوقت فيها
و جبت هاتريك
وشي زنهر
طاخ طرخ
و طاخ طرخ
احتضني وقال برافو
اندهشت
راجعت نفسي
اتلقيته كان قاصدها
و سابني اكسب
كان عايزني افرح شوية
زي طفل كبير مأنتخ
يا حبيبي و نور عنيا
و ابن عمري
طلعت أصلي
مشّ أونطة
و واد مفخفخ
شفت نورك
جوه قلبك زي قلبي
ابني صاحبي
يا ناس بجد
ف الرجولة ند ند
فرحتي كانت بتصرخ
اتصاحبنا وصرنا واحد
سري عنده
و سره عندي
قال لي نكتة
ضحكتني
قلت أرد بنكتة أنأح
ابتديت أحكي
و يضحك
بان كأنه مستكيف
مستمخ
و كل ما أنكت
يقهقه
واد مجامل
بس مجدع
رغم ان النكتة بايخة
كان مكركر
مستكنيص مسخسخ
كاني ابنه
و هوه أبويا
بيناغيني
بالحنان عمال يضخ
فجأة قالي يالا نلعب
ماتش تاني
قلت لا لا مستحيل
ما تأفشت ياواد خلاص
كنت دايما بتراضيني
لأ عافيني
اعتبرني عندي شرخ
عندي ملخ
عينه لمعت بابتسامة
و قال لي يعني
راضي عني ؟
قلت جدا
قال لي
مد كفه
و قال لي
“شخشخ “
