مهلا معالى رئيس الوزراء نعم انت تتحمل المسئولية فى ظروف غاية فى الصعوبة والشعب تحمل وعانى ومازال يصبر ويتحمل الصدمات اليومية والمتتالية حبا فى مصر وما نطلق علية لفظ الوطنية
لكن سيدى معالى رئيس الوزراء بل كل السادة الوزراء الشعب المصرى ليس الشغالة فى خلايا النحل او مملكة النمل يكلف بالعمل الشاق والاجتهاد لخدمة السادة من الملكات والذكور وحراس الملكات فقط لكننا تعلمنا زمان فى المدارس والجامعات بل كنا نسمع ونرى دائما مقولة قد لا تكون سمعتها او عرفتها او مارستها من قبل لانها كانت فى عهد العدل والكفاية والانتاج كانت المقولة تقول ان الشعب هو مصدر كل السلطات والقرارات والقوانين كان الشعب هو الملهم والمصدر لكل تشريع او قانون او سلطة تقولى ازاى هرد عليك واقولك كنا زمان بنبلغ رغبتنا وارائنا من خلال جلسات استماع فى الاتحاد الاشتراكى حزب واحد زمان من القرية الى المركز الى المحافظة الى فوق اللى هو انتم النهاردة لا عندنا احزاب توصل ولا حوار مجتمعى مع الشعب الحقيقى ولا نواب توصل صح ليه لانهم لا يمثلون الشعب هم نواب قوائم نواب اشتروا الكراسى بالاموال علشان كده دائما ارائهم لصالح فئاتهم واهلهم واللى زيهم انما نواب الغلابة القلة بيصوتوا وبيصرخوا داخل البرلمان وينتهى كل شئ برفع ايد زعيم الاغلبية والكل بيرفع وراه وكانك يابو زيد ما غزيت ونسيتم كلكم ان الشعب هو مصدر السلطات وملهم القوانين والقراراتكم تعلمناها ومارسناها زمان
معالى رئيس الوزراء الشعب مش هو الشغالة فى مملكة النمل وخلايا النحل لا اسف الشعب هو الشعب الفقير وهم العامة نفسه يصحى فى يوم الصبح يلاقى قانون حلو قرار كويس يفرح وينبسط ويشعر فعلا بالامل والتغيير وانكم حكومة الشعب الغلبان انما كل يوم ضرب فى ضرب نصحى نلاقى ارتفاعات جنونية فى كل الاسعار والخدمات وسوء معاملة فى المصالح والمدارس والمستشفيات وكله ادفع اولا واحنا نخدمك
شوف وانظر حولك فى وزارة الدفاع لما عملوا اختراق ضاحية فى العبور كيف تجاوب الشعب كله معاهم انظر واتعلم من وزارة الداخليه لما تفاعلت مع الشعب وسمعت له عن طريق فيديوهات الاستغاثة ومدى الاستجابة والتحرك الفورى منها كيف ارتاح لها وتفاعل معها الشعب لانه كما قلت لك الشعب مصدر السلطات وملهم القرارات وعايز ونفسة مرة واحدة يشوف من الحكومة قرار او قانون يفرحه ويبسطة ويكون منصف لمطالبه ورغباتة ولو مرة واحدة فى العمر الجديد مش كل يوم حرقة دم وغضب شعب وضرب جديد قال ايه وكله بموافقة البرلمان بتاعكم مش بتاع الشعب الفقير الغلبان
الشعب مصدر السلطات واتقوا غضبة الشعب فلكل طاقة تحمل والاكتاف انهكت تماما ومش كل مرة لازم الرئيس يتدخل
مش كده ولا ايه
