طبعا الكثير منكم لا يعلم شئ عن اصحاب هذه الصورة النادرة رغم شهرتهم فى الكوميديا المصرية زمان ايام الفن الهادف الراقى الجميل وكان معروف عنهم فن الفشر
الفنان ابن منيا القمح محمد احمد المصرى الشهير فنيا باسم ابو لمعه المصرى والخواجه بيجو وهم يمثلول لوريل وهاردى الامريكان فى الفن المصرى
ثنائى جميل امتعنا واضحكنا بالفشر والخيال وكان ابو لمعه سيد الفشارين والخواجه بيجو ينهبل من فشر وخرافات ابو لمعة
كان تمثيل فى تمثيل بعيد كل البعد عن الحقائق وكنا متقبلينه علشان عارفين انه تمثيل
مات ابو لمعه ومات الخواجة بيجو وسابوا لنا الفشر اللى كان تمثيل فى تمثيل وتحول الى فشر حقيقى من الكل الكل ادمن دور ابو لمعه والناس ادمنت دور الخواجه بيجو يشد فى شعرة ويسمع وخلاص
كل يوم فشر انا جبت انا اللى عملت انا اللى رحت انا اللى تعبت انا اللى بجرى انا مظلوم بيسرقوا اعمالى حرام عليكم دة ابو لمعة
اما الخواجه بيجو اليومين دول عارف وفاهم فشر ابو لمعة غير زمان لان الزمان اتغير وبقى الناس عارفة الفشر من الصدق وعارفة الصالح من الطالح وعارفة مين اللى عمل ومين اللى جاب ومين اللى راح ومين اللى تعب
المشكلة فين عارفين اقولكم انا المشكلة ان ابو لمعة بتاع هذا الزمان غير ابو لمعه بتاع زمان بيفشر ويصدق نفسة بيفشر ومفكر الناس مصدقاه بيفشر والناس بتضحك عليه مش منه زى زمان
وعاد ابو لمعة والخواجه بيجو من تانى بس مش تمثيل والله العظيم على راى ريا فى مسرحية ريا وسكينة دة مش تمثيل والله العظيم ده حقيقى فى زمن الغرائب والعجائب
رحم الله الفنان محمد احمد المصرى ابن منيا القمح ابو لمعة فى ساعة لقلبك زمان ووقانا الله شر ابو لمعة هذه الايام
