هم دول ممثلين الشعب فى مجلس الشعب اسف اقصد مجلس النواب لانه فعلا لم يعد مجلسا للامة كما كان ولا مجلسا للشعب زى زمان بل اصبح اسم على مسمى مجلس النواب بس لا له دعوة بالامة ولا يخص الشعب
هؤلاء اللى هيمثلوا الناس ويعبروا عن مطالبهم ومشاكلهم ويقفوا مع الغلابة والمساكين وفقراء الشعب ازاى دول واللهم لاحسد كلهم بدل الوان واشكال وكرفتات مخصوصة وورد فى الجيوب اش احمر واش اصفر واش اسود وناهيك عن الانسات والسيدات والبرفانات والازياء والتوارث والتعود على المقاعد وخاصة نواب القوائم ابا عن جدا وقال ايه كان هناك مهندس انتخابات على مستوى عالى طبعا الجمال له ثمن والكرسى له ثمن والتواجد له ثمن
امال فين اللى هيمثل الناس اللى كانت بتاكل ولادها بذنجان مقلى وبطاطس ومعدوش قادرين مين اللى هيمثل الفقراء اللى كان اكلهم عسل وطحينة مش لاقيين طيب مين هيتكلم عن الفلاحين ومشاكلهم مع الزراعة ومين هيقول هنا العمال ومتاعبهم فى الحياة مين هيتكلم باسم ملايين الشباب اللى بيروحوا العاشر وغيره من الفجر يرجعوا بعد العشاء بملاليم وبيتحكموا فيهم اصحاب المصانع وان كان عاجبكم كان دول البهوات اصحاب الفيلات والقصور والابراج وشركات المقاولات هم اللى هيناقشوا قانون الايجارات من تانى ويرحموا المواطن العجوز من الطرد فى الشوارع بعد سبع سنوات عجاف كان دول نوابنا اللى هيشوفوا اصحاب المعاشات المرميين فى طرقات التامين الصحى والمستشفيات بحثا عن علاج او حقنة ولا حتى شريط برشام هم دول اللى هيشوفوا كبار السن وهم متسندين على العكاز وقفين طوابير لقبض المعاش بدل من توصيله لهم تقديرا واحتراما لما قدموة طيب ليه يهمهم فى ايه حياتهم مستريحة ومبسوطين ولا بيركبوا تكتك ولا بيمشوا على عكاز
هم فى وادى والشعب فى وادى على راى الملك فاروق ياجلالة الملك الشعب مش لاقى ياكل قال ليه ما يكلوا بغاشه ماهو لا عارف ولا حاسس وهم كذلك الشعب مش لاقى ياكل زينا كافيار وسلمون ورومى ولحوم وبلاها بذنجان وبطاطس وخيار وبلاش وحوحه والرزق من عند الله
اين نواب المعارضة ياسادة فين نواب المعارضة يافضيلة مولانا مهندس الانتخابات عوضنا على الله ورحم الله البدرى فرغلى ورجب حميدة ومحمود القاضى وممتاز نصار ونوال عامر ومحمود اباظة وخالد محيى الدين وضياء الدين داود الكبير وغيرهم وغيرهم من نواب زمان ولا طاقيه ولا جلباب ولا افرول عمال واحد فى المجلس والله حرام ده حتى عيب لا يمثل الفقراء اى حد مع انهم اكثرية وقطاع كبير عوضنا على الله ولنا رب كريم
بالعربى هؤلاء لا يمثلون الشعب بل يمثلون القوائم ومن اختارهم فقط
مش كده ولا ايه
