لما يكون المئات بل والآف بيشتكوا من نتيجة الثانوية العامة لهم … بالتأكيد في حاجة غلط …
لما طالب غاب عن الامتحان وياخد درجات في مادة الغياب ..
بالتأكيد في حاجة غلط ..
لما طالب يكون درجاته في كل المواد كويسة ويجيب صفر في امتحان العربي …
بالتأكيد في حاجة غلط ..
لما طالب طوال تاريخه الدراسي متفوق وبشهادة جميع مدرسيه ويرسب في ثلاث مواد ….
بالتأكيد في حاجة غلط ..
لما طالب يتوقع أنه يحصل على اكتر من 95% ويلاقي نفسه راسب في مادتين ومجموعه 40% .
بالتأكيد في حاجة غلط ..
لما طالب عارف أنه فاشل والكل عارف كده ويحصل على مجموع فوق 90% …
بالتأكيد في حاجة غلط ..
لما مدرسه في قرية يكون عدد طلاب الثانوية العامة بها فوق 400طالب وده عدد كبير جدا على قرية ونلاقي فيها لجنه واحده وبأرقام جلوس مسلسله كلهم فوق 95% ….
بالتأكيد في حاجة غلط ..
لما يكون معظم الطلاب درجاتهم في الكيمياء والفيزياء متشابهة وكذلك في التاريخ والجغرافيا متشابهة وكذلك في البحتة والتطبيقية متشابهة ….
بالتأكيد في حاجة غلط ..
لما يكون مدارس بالكامل فيها 3او 4طلاب فقط ناجحين …
بالتأكيد في حاجة غلط ..
لما طلاب تنتحر بسبب نتيجة الثانويه العامة التى لم تكن تتوقعها …
بالتأكيد في حاجة غلط ..
لما يكون اكتر من 95%من المدرسين غير مقتنعين بالنظام التعليمي الحالى ولابنظام الامتحانات ولا بنتيجة الامتحانات ولا بأسلوب الوزير في التعامل مع جميع الأمور …
بالتأكيد في حاجة غلط ..
لما الوزير يتعهد بمحاربة الدروس الخصوصية ومع ذلك تنتشر الدروس بشكل لم يسبق له مثيل ….
بالتأكيد في حاجة غلط ..
لما يمنع طباعة الكتب المدرسيه ويسمح بتصوير النسخ القديمة والدخول بها للامتحان ويقول الامتحان مش من الكتب … بالتأكيد في حاجة غلط ..
لما يكون العجز في المدرسين رهيب ويتعدى حدود الخطر وترفض التعيينات الجدد ثم تطلب مدرسين متعاونين بالحصة من اي حته وبدون أدنى مقاييس للكفاءة وعاوزهم يعلموا الطلاب طرق التفكير الحديثه والمهارات اللوذعية لاجتياز الامتحانات الخزعبلية … وعندها يضطر الطلاب للدروس الخصوصيه عند أصحاب الخبرة والكفأة ثم تتهم الطلاب بالجهل والغباء والمدرسين بالجشع والاستغلال ..
بالتأكيد في حاجة غلط ..
لما يكون ترتيب مصر في مستوى التعليم رقم 13عربيا ورقم 139عالميا … ثم تدعي النجاح وان كثير من الدول تطلب منا الخبرة والمشورة في مجال التعليم …
بالتأكيد في حاجة غلط ..
طلابنا مش اغبياء ولا كسالى بل معروف عن المصريين الاهتمام بتعليم أولادهم بدليل أنهم الاوائل في كل دول الخليج حيث يتواجد جاليات مصرية …. ولا تتواجد شكاوي من النتائج كما يحدث هذا العام …
بالتأكيد في حاجة غلط ..
لما يكون العام الدراسي مكدس بالتصريحات المتضاربة كل يوم ومحدش عارف بكرة هيكون في أية واي موعد مش معروف إلا قبلها بفترة بسيطة جدا …
بالتأكيد في حاجة غلط .. لما يكون كل اللى بيتكتب عن التعليم ووزير التعليم في وسائل التواصل الاجتماعي بيوصل للوزير والمسئولين ومفيش اي رد فعل … يبقي في حاجه غلط … ولو مفيش حاجه بتوصل عن متاعب الناس والطلاب ومعاناتهم ووزيرنا عايش في برج عاجي …يبقى أكيد في حاجة غلط …
وبعد كل ده لانجد من سيادة الوزير إلا تصريحات كاذبة ومخادعه وتفسيرات مضللة مع تلك الابتسامة الصفراء البلهاء المقيتة … ولنا الله .
