ماتساهر بي
ولاتشتاق
البيني وبينك عدي خلاص
وده اخر الريده عذاب وفراق
ماتساهر بي
واوعك تشتاق
ماتعد نجمات الليل وتهيم
تتقلي علي نار الذكري
وتعزي علي الأطلال عينيك
تاخد من وجع الريد فكرة
لي نص تبكيه حروف ودموع
تتخيل جرح الحب بيبرأ؟
انا نارك كاوية خيال افكارك
وساكناك بس كده بالفطرة
ياروحي بشيش
خليني اغمض علي صوتو
الموج الحالم نبراتو
موسيقي الضجة الفي خفوتو
ولمن بس طيفو يزور عيني
احلامي الرصيتا بيجوطو
انا كنت بعد نجمات الليل
اتقلب بين افلاك الشوق
اتغطي رموش عينيك غطاي
واتوسد حلمنا يا المعشوق
لامينا وطنا وفرحانين
لاهم تعليم لاعيش لاسوق
كل الناس رايقة وحابة الناس
يتبسمو كل ماطل شروق
إلاها دي أحلام الطايرين
بجناح آمال والواقع طوق
ماتساهر بي
ولا تشتاق
وهو اصلو الحب كباية قهوة واوفلتين؟
عهود شهدنا عليها النيل؟
مشاوير في الكبري مشيناها
شعور محتاج للتاني يميل؟
♡
الحب بسمة عاشقين ساي بس
حتي ان ضاقو الاهوال والويل
والحب ياسيدي قدر مانفس الشوق يقصر
تلقاه طويل
والحب بيخلي قباحة الكون أجمل
ده الحب بي رغم قساه جميل
مابس كلمات ووعود وخلاص!
الحب:دلوكة،أمان،وإكليل
تهديني رياحين الكلمات:-
هذا ياوردة أعصابي شجر الغيرة
زهرات صفراء نبتت
علي أسوار الجسر كثيرة
وأنا والظل وشجر الجسر
نتوجك اليوم أميرة
اتشعبط في نص كم ريدك
غييانه وكت قايلاه طويل
وكلاب الشارع لما تمر
بتضاري وراك ضهرك لي حيل
واحلم بي فجري الجاي معاك
وجواك داسيه ضلام الليل؟
ماعارف انو الفاقد الريد مابديه؟
بالغت عديل!
كان قصرت علينا المشوار
وماساسق بي خطواتنا النيل
ماتساهر بي
ولاتشتاق
البيني وبينك عدي خلاص
وده اخر الريده عذاب وفراق
ماتساهر بي
وأوعك تشتاق
