يا ريت نفهم إن السوشيال ميديا ما هي إلا وسيلة الغرب لتدمير عقول وأفكار أجيال بالكامل، بقي كل حلمهم إنهم يطلعوا تريند فقط.
المشكلة مش إنهم يطلعوا تريند المشكلة في كم القذارة والمهازل اللي بقينا نشوفها، ناس بتاجر بالدين وناس بتاجر بشرفها، وناس عندها استعداد تعمل أي شيء في مقابل إنها تتشهر.
طب لو صحيت من النوم كدة في يوم وملقتش في سوشيال ميديا خلاص قولي كدة هتعمل ايه مصدر دخلك هيبقي منين؟؟؟
طب بلاش دي، مفكرتش إن الطفل اللي لسه مش فاهم حاجة وطلع للدنيا لقاك وقرر يقلدك لمجرد إنك بيدخلك فلوس كتير واقتنع إن هو ده النجاح، إنت فاهم انت بتعمل ايه في المجتمع بالشكل ده!!!
طب عارف عقابك إيه عند ربنا، بسم الله الرحمن الرحيم
(إِنَّمَا جَزَاءُ الَّذِينَ يُحَارِبُونَ اللَّهَ وَرَسُولَهُ وَيَسْعَوْنَ فِي الأَرْضِ فَسَادًا أَنْ يُقَتَّلُوا أَوْ يُصَلَّبُوا أَوْ تُقَطَّعَ أَيْدِيهِمْ وَأَرْجُلُهُمْ مِنْ خِلافٍ أَوْ يُنفَوْا مِنَ الأَرْضِ ذَلِكَ لَهُمْ خِزْيٌ فِي الدُّنيَا وَلَهُمْ فِي الآخِرَةِ عَذَابٌ عَظِيمٌ).
قدامك فرصة تصلح غلطتك، قدامك فرصة تتوب وترجع لربنا سبحانه وتعالي، قدامك فرصة تبقي شخص محترم ربنا يستخدمك في الخير بدل ما يستبدلك ويأتي بغيرك.
أنا عارف إنها صعبة بس جرب كده خد القرار وشوف ربنا هيوقف معاك إزاي، هتلاقي كل امورك بتتيسر كل الناس اللي بتشوفك بتدعيلك، مش مليون بني آدم بيتحسبن فيك.
والله إحنا لو إستخدمنا السوشيال ميديا دي صح هنبقي في حتي تانية خالص، وبدل ما هيا سلاح لتدمير أجيال هتبقي سلاح قوي جدا لنشر الوعي والثقافة والدين وصناعة أجيال عظيمة قادرة علي بناء دولة قوية عظيمة.
اللهم اهدي شباب وبنات المسلمين وانصر الأسلام وأعز المسلمين.
