وصداع مالوش أسباب غير قلة الحيلة..
ووجع مهوش مننا…..ولاهوه م العيلة
والقلب بيت الداء
أهل الهوى أعداء….اذ فقدوا معنى الشوق
الجو بقي مربوء
لو بس ساعة هدوء…الحالة تتغير
ومزاجنا يصبح عال
حبة أمل لعيال مستنيين بكره
عاوزين مرور لزمان بابه مالوش أكره
وعليه ميتين جنزير …نوايا تسند زير….
.ادونا شئ لله …..أيتها شغلانة…..
الظلم خد خانة
ملهاش وجود فى الدور
الطاولة مقلوبة…
والضلمة عفيت قوى مبقاش هينفع نور
الخطة مغلوبة
والجو درجة حرارته أربعين..طوبة
فيه لخبطة أحاسيس
فيه ستلاف ابليس بيوسوسوا فينا
اتكاترت الكوابيس ع الحلم وعينينا
اتفرقت روحنا فدخل مابيننا الموت
ولاعمره كا يقدر الا اما نسمح له
احنا اما كنا نموت..كان يبقي علي كيفنا
بعد اما نستكفي..م العيشة والحواديت
بعد اما تبقي الحياة مش لاقية حد يعيش
فتخاف لتبقي مفيش
تصعب علينا نموت
وعشان نوسع مكان للحب والتطوير
اصل احنا كنا زمان مش زى دلوقتى
لا دا احنا كنا كتير
تعدادنا كان همة
والحب كان أمة
والصبر كان قناطير…..كنا بنتونس ف الهو بالعصافير
والصدق كان ذمة
والقوة كانت نوايا ….والمعارك خير
أيامها كنا كتير
والدنيا تخشانا….زمان مكناش نخاف
كان ربنا معانا
