٠٠٠٠يا ساكنين الأرض
يا مرَوحين كُلُّكُم
يا دايبين في العِز
أو حتى مغلوب غُلبُكُم
الحياة دي فيلم هابِط
لا ليها ظابِط ولا ليها رابِط
فاكرينها دايمة والحَقيقة
شوفوها في اللي قَبلكُم
لَو في يوم دامِت لُهُم
يبقى أكيد ها تدوم لُكُم
قابِلتُم حَد خَلِّد
مهما حِوِّش في جيبُه؟
أِو إنسان مرة حَدِّد
إزاي يختار نَصيبُه ؟
عَدد ساعات اليوم
ما نقصشِ مرة واحدة
إمبارح كان فيه ناس
مش موجودين النهار دَه
اللي جايين راح يفوتوا
واللي عايشين راح يموتوا
واللي طايرين في السحاب
عالأرض لازِم ينزلِلوا
والمَدفونين تَحت التراب
فجأة بيِعلوا ويِنجلوا
الحَياة مالهاش هُوِية
ساعة رايحة وساعة جاية
بتعَلِّي ناس وتهِد ناس
وتدِل ناس وتضِل ناس
وتذِل ناس كانت قوية
واقعها عالم افتراضي
حاضرها في الأصل ماضي
ومهما كان الكوز ملان
ها تجيلُه لحظة ويِبقى فاضي
فيها القريب ماهوش قُرَيِّب
والغريب هُوَّ اللي طَيِّب
والحبيب صاحب نفوذ
واللوم تَمَلي عاللي راضي
يا مغرورين بالحياة
لو كنتُ ناسيين إيه مصيركم
النهار ده الدنيا ليكُم
لكن بُكرة لغيركُم
دي دنيا بنت دنيا
خَداعة تافهة فانية
بإيد بتسقيكُم عَسَل
والتانية مُر يغُمكم
الحِسبة لازم تتفهم
قبل ما يضيع عُمرُكُم
٠٠اه اه اه ٠قبل ما يضيع عمركم
