انا اتغيرت للأحزن
بفضل الله بقيت احزن من الأول وبانت كافة التجاعيد
كأنى لاعمرى مرة ضحكت ولا يوم عدى كنت سعيد
بقيت محتل ومحاصر وقلبي ف حتة
وعيونى وروحى بعيد
وماتت كل أحلامى وهما صغار
وضربوا الحى من إحساسى حتى انهار
لكن لسه فى قلبي حياة ولسه العزم فيا شديد
ولسه بغضبي ونقاوته..ولسه بغيظى وحلاوته
ولسه بعندى وغباوته ولسه الصبر له فايدة
ولسه مشاعرى عارفة الحق وهويدا
وجوايا بيان للروح كأنه بصوت (ابو عب يدة)
انا اتغيرت للأحزن وعندى كفاية م التنهيد
بقيت خايف
وجوايا حتت فاضية…. وزمن واقف
ف قلت الجأ إلي الطائف لقيت معبر رفح مقفول
وملك الموت عمل إعلان.بيطلب وكلا بالأكفان
فقررنا …..
بما إن احتمال الموت هو الأعلي
وإن الموت بيبقي احلا اما تبقي شهي د
وان احنا كده هنموت…كده هنموت
نموت……… نبقي تحررنا
نموت…..ونخلى أفكارنا ونبنى علي الأمانة جدار
ويحفظها الزمن والخضر… لما يكبروا الثوار
مادام ربك مقدرنا
وايه الموت ؟
ماعارفينه وحافظينه وعاجنينه وخابزينه وجربناه ميتين نوبة
وعودناه يعدى علينا ياخد حسنة كل يومين
وعلمناه يجينا منين
وسيبنا له ….ورا باب الحياة أعمار
كبار وصغار… رجال ونساء
وكوز مربوط بخيط الأ قصي يشرب منه كيف
يشاء
وجهزنا ورا الأرحام نطف موجودة بزيادة
وفيه حلة ملانة حزن بالزغاريط
وحمل غبيط رضا … ينفع ليوم الآه
وقررنا ….نطارده احنا ونجرى وراه
ونستناه….ونرمى العمر جوه رحاه
فينزل بذر روح الحق.. ترويه السما بحياة
ونطلع له من الأوراق
ونتحول لكلمة صدق تملا الكون بكا وغناء
مادام الدنيا مقلوبة هنبنى العمر دور تانى من الأنفاق
