فاكر سنة 2011 لما نزلنا كلنا نحمى بيوتنا علشان مكانش فى أمن ولا أمان …
فاكر لما العيال الصغيرة كانت شايلة سيوف فى الشارع ويوفقك بعربيتك يقولك رايح فين ومين اللى راكبة جنبك وهاتوا بطايقكم!!! …
فاكر الحرائق والنهب والسرقات …
فاكر ميدان التحرير وكل مخابرات دول العالم مقيمة فى الميدان واحداث محمد محمود والمجمع العلمى!!! …
فاكر الأشكال الضالة اللى كانت بتطلع علينا تتكلم وكأن البلد بقت بتاعتهم …
طيب فاكر المناظر الإرهابية اللى ظهرت فى كل الشوارع…
وفاكر عمليات الاغتيال لجنودنا وظباطنا وشبابنا … المجندين …
فاكر لما معظم الدول منعت عنك السلاح وفاكر طيارتنا اللى راحت تعمل عمرة مرضوش يرجعوهالك علشان متعرفش … تحارب الارهاب اللى كان متدبرلك لهدم الدولة المصرية …
فاكر لما اللى ميتساموش كسبوا الانتخابات وعم الحزن مصر …
طيب فاكر لما اتفقوا يبيعوا سيناء فى صفقة …
طيب فاكر لما قبضوا مليار دولار مقابل بناء سد النهضة …
طيب فاكر لما باعوا وثائق الدولة السرية للعملاء والدول الخائنة …
اكيد طبعا فاكرين ثورة 2013 وفاكرين 30 يونيو و7 يوليو وفاكرين كانت اية مطالبنا وفاكرين اننا كنا عاوزين بسرعة نقضى على الارهاب ونزيحهم من البلد ونبتدى نبنى ونعمر بلدنا …
اكيد فاكر حرب الشوارع وقتل المواطنين الأبرياء وحرق الكنائس وقتل المصلين فى المساجد والاغتيالات وتدمير البنية التحتية وأهمها شبكات وابراج الكهرباء … مش ممكن هننسى ابدا ابدا …
فاكر لما فى 2016 احتياطى النقد الاجنبى القابل للصرف وصل ل800 مليون دولار فقط بسبب كل الأحداث إللى فاتت وبدأ الإصلاح الاقتصادى …
ودلوقتي ناس كتير بتطلب من الدولة كل حاجة وكأن البلد ممرتش بمشاكل ضخمة على مدار اخر 10 سنوات كادت أن تقضى عليها لولا تضحيات الجيش والشرطة ورئيس مصر اللى حط حياتة وحياة اسرتة فى خطر أمام بقاء واستمرار مصر! …؟
زى ما تحملنا كل اللى فات دة واحداث اكتر بكتير … هنقف جنب بلدنا وهنسندها وندعمها ونحافظ عليها إلى الأبد.
مصر عظيمة وهتفضل عظيمة بشعبها وجيشها وشرطتها.
تحيا مصر للأبد
