- الجرجير..و الشبت و البقدونس و الكزبرة
هيتزرع في حوض او قصرية او في ارض الجنينه بالبذرة مباشرة.. نخف عدد البذور في المكان.. ممكن نخلط شويه بذور بشوية رمل عشان اقلل كثافة البذور في المكان..
هروي الاول ريه كويسه.. و بعدها انثر البذور.. ومرويش تاني غير بعد 5 ايام لما يطلع.. و الريه اللي بعدها تكون ببطيء شديد عشان النموات متميلش و تموت و ولو هزرع في قصريه ولا قفص تكون التربه واصله لقرب الحافه. و طبعا متعرضه للشمس كويس جدا و الري مش كل يوم. الجرجير ميحبش الميه الكتير..
الكلام ده هينطبق برضو علي الشبت و البقدونس و الكزبرة بس هما بيتأخروا عن الجرجير في الانبات…و الكزبرة نذود كمية البذور لان بيكون كتير منها مكسر.. - السبانخ برضو هتبقي نفس النظام في حوض مباشر مش هنشتل. و متنسوش تخلطوا سماد بلدي مع التربه او كمبوست بنسبه 1 سماد الي 3 تربه..
- الفجل الاحمر و الفجل الابيض و اللفت و البنجر.
هيتزرع في الارض بنظام خطوط بين كل بذرة و التانيه حوالي 7 سم و لازم عمق ميقلش عن 40 سم و وزراعه البذرة نفسها تكون علي عمق نص سم من سطح التربه و يفضل التربه تكون خفيفه. لو هزرع في حوض مربع في الارض مش خطوط.. يفضل بعد الانبات و ظهور اول ورقتين حقيقيتين اني اعمل خف للنباتات.. يعني اي 2 قريبين لبعض اوي اشيل منهم واحده عشان النبات ياخد حجمه كويس.. ميبقوش لازقين لبعض. فالبتالي نلاقي حجم الجزء المستهلك صغير. - الطماطم و الفلفل و البتنجان ..
لازم يتشتل الاول. سواء صواني شتل كل بذرة في عين او عمل حوض ننثر فيه البذور و بعد الانبات بحوالي 3 اسابيع و يوصل طول الشتله حوالي 15 سم.. ناخد كل شتله ازرعها لوحدها. لو في الارض هزرع بين كل شتلة و التانيه حوالي 50 سم ..
الشمس طبعا مهمه جدا جدا علي طول.
- البطيخ و الكنتالوب و الكوسه و الخيار.و القثاء.
بيتزرعوا مباشرة في الارض بدون شتل بين كل بذرة و التانيه من 25 الي 50سم حسب حجم النبات النهائي. وينفع برضو يتشتل. - الباميه.. تتنقع البذور قبل الزراعه بيوم. وتتزرع مباشر في التربه بين كل بذرة و التانيه 25 سم.
التسميد مينفعش قبل تكون الورقه التالته الحقيقيه للنبات..
الري الصبح بدري او اخر النهار
الصرف يكون جيد جدا او اروي علي قد الحاجه بالظبط
