خاني لكلام
راسي يا راسي
بشوم الحكرة
جذرو اللساس..
فاس ومدرة
رحبتي درات
الزريعة تلفات..
مالكي يا الوقت؟
را ني انسان
نصفيني..
فالظلام..شفت فيك..
شفتي فيا..تبسمتي..
نسحاب.. ديالي.. ديالك
وديالك.. ديالي..
ملي طلعت شمسنا
بانو نيابك..
لقيت.. راسي يا راسي..
ديالك ..ديالك ..
وديالي..حتى..هو.. ديالك..
وفين أنا؟
فين أنت؟
وأحنا؟ وهما؟
فين هاداك لي رأسو شاب
وهو ما زال شباب..
غارق فالمحاين
عايش عيشة لمرار
يسلك الوقت
وبين ايه..ولا..
يرضعو السكات..
عينو غير على غدا
اما اليوم..
اليوم..
فيه ما يكفيه بلا عبار
فين غادي أنا؟
فين غادي انت؟
أيامنا تحلقمات
بضحكة صفرة خرفات..
لغتنا تعرات…
بغربال تغطات..
اييه..مابقى ما يتخبع..
العين شافت
والقلب تفكع..
وف نص ليل الوجع
كل واحد فينا..
دخل سوق راسو..
سد بابو..
وبدا يداوي..
جراحو بسكات..
