بيت العز ….بيتك يا ابويا
بيت أبويا
بيت ابويا مش كبير
بس الخير فيه كان كتير
يساعي الدنيا كلها الصغير والكبير
واحترام الكل واجب ومفيش عين تعلي علي الحاجب
واحترمي يا بنت اخوكي الكبير
ولو هو الصغير احترامه واجب
وهو عليكي في الطريق حارس ولما يجيلك عدلك هاتلاقيه واقف في ضهرك وفارس
والجد والجدة أيديهم تنباس و طلابتهم أوامر ويتشالو فوق الراس
واختي الكبيرة دي امي التانية وعند ابويا هي الغاليه أصلها للهم يا حبيبتي شايلة وتدافع عن اخواتها وست بيت هايله
والام تصحي من الفجرية و تصحي الكل قوم ياحبيبي اصحي صلي الفرض انت وهي
اما ابويا كان انسان
صحيح بسيط
وعلى قد حاله لكنه كان دايما نشيط
يشتغل ويساعد
والكل عليه ساند
وساعة العصرية امي في البلكونة لراجلها قاعدة مستنية
يجي محمل وشايل
والكل يجري عليه أبويا جه ويطلع من جيبة
خد يا واد خدي يا به
ونتسابق عليه مين يشيل الخير من ايديه
امي بسرعه تجري تحضر لنا اللقمة ولابونا الهدمة
والاكل يبقا أقدامنا لكن بأيدة يأكلنا
والسنين أوام عدت والعيال خلاص كبرت…….
والعيال بقت ستات ورجال
ودي متجوزة وبعيد عن البيت بالاميال
وده سافر اشتغل برة وبقا عنده زوجه وكمان عيال
وابويا خلاص كبر ولسه للهم شايل حمل الجمال
البيت عليهم فضي وابويا مستني نزورة ونطلب منه حاجه تنقضي
لكن العمر خلاص يابويا كان بينقضي
راح اشتري ليا ولاخواتي حاجات
ورجع طلب من امي كوباية شاي
غابت عنه دقايق رجعت تكلمه لقته في حضنها وشريك عمرها مااات
ونور البيت خلاص انطفي وراح منه الامان والدفي…..
وبعدها مش بكتير البيت بعد امي اتقفل
