( عبد الباقى والخماسى الحديث)** الدكتور عبد الباقى العظيم معلوماته فى الأولمبياد زى معلوماتى فى اللغه البولنديه ماتفرقش كتير
لقيته النهارده بيسألنى هو يادكتور/محمود إحنا أخدنا ميداليه ذهبيه فى لعبة إيه ؟
قلت له (الخماسى الحديث) وطبعاً علشان أنا متأكد إنه مش عارف إيه هى لعبة الخماسى الحديث فشرحتها له
** عبد الباقى قال لى
دى لعبه صعبه جداً وعاوزه مجهود جبار ولياقه عاليه
قلت له طبعاً دى تعتبر أصعب لعبه فى الألومبياد كلها
** عبد الباقى إتكلم كلمتين تلاته بصوت واطى أنا ماسمعتهومش بصراحه بس فهمت منهم إنه عاوز إبنه (إياد) ربنا يبارك له فيه ويحفظه ويكرمه يمارس لعبة الخماسى الحديث
فقلت له إسأل فى المركز الأولومبى اللى فى المعادى أو إعرف عنوان الإتحاد بتاعهم فين وإعرف منهم إزاى يمارس اللعبه
** لقيت عبد الباقى بيقول لى أنا بأتكلم عن نفسى
أنا اللى عاوز ألعب اللعبه دى
ياعم عبد الباقى إنت بتنهج لما بتوطى علشان تربط رباط الجزمه ونفسك بيروح وإنت ساجد فى الصلاة
ياعبد الباقى إنت ظهرك بيوجعك بعد نوباتجية يوم السبت وبتبقى مش قادر تمشى وبعدين إنت كمان مش بتعرف تعوم ولما بتقعد على الميكروسكوب شويه بتقوم مصدع ودايخ ومحتاج حد يسندك
ياعبد الباقى ياحبيبى إنت ماشى بالبنادول والإندرال يعنى مش عاوزك تتغر فى نفسك
الخماسى الحديث ده لا فلوسيتومترى ولابذل نخاع دى لعبه عاوزه صحه وعافيه وإنت ماتآخذنيش صحتك على أدك يعنى إعقل كده ورحم الله إمرءا علم قدر نفسه وخليك فى اللى بتفهم فيه أحسن
