كلما اقتربنا من موسم اى انتخابات حتى ولو انتخابات نقابات او اندية او حتى مراكز شباب وصولا الى اقوى انتخابات المفروض يعنى النواب بشيوخه ونوابه نجد ظهور على السطح كدة شخصيات كانت متواجدة فى الحقيقة زمان وبتتكرر مع كل انتخابات زى عبد الله بن ابى ابن سلول وكان يلقبه المسلمين فى عهد رسول الله صل الله عليه وسلم بكبير المنافقين كان يزاول النفاق على اوسع نطاق بشتى الطرق والسبل وكان ينشر الفتنه بين المسلمين وتظهر هذه الفئة السلوليه مع كل انتخابات فاهل النفاق يعتبرون موسم الانتخابات سبوبة ورزق حرام حلال مش مهم موسم جمع الاموال والغنائم والوقيعة بين الناس
وتظهر ايضا فى قدوم كل موسم انتخابات شخصية عبدة مشتاق عايز اكون نائب ياباشا والناس تقول النائب راح النائب جه اشمعنى انا يعنى مكنش نائب معايا فلوس ادفع وادخل ماشى تاخد وتدخلنى مفيش مانع اترشح وايدك معايا وتنجحنى جائز المهم انا عبدة مشتاق اكون نائب واهو حاجة من ضمن البريستيج بتاعى ديتها فلوس ادفع ياباشا واكون نائب
وياسلام على شخصية الدوبلير المتسلط من اهم شخصيات مواسم الانتخابات وهى كلها سبوبة انتخابية بردة اترشح علشان تحارب فلان وخد اللى انت عايزة ياعم مش هنعرف نحاربه المهم نتعبه والسلام طيب لية ياباشا وانت مالك خد واترشح واخرس المهم دى وسيلة لتفتيت الاصوات
حلق حوش من شخصيات الدراما فى الانتخابات شخصية وهبه السوالمى وشخصية رفيع بيه وصراح العبيد والاسياد والراس براس ومفيش حد احسن من حد وهى نغمة ومنتشرة هذه الايام وده حق من حقوق وهبه السوالمى طبعا بعد ماكان بيمد ايده لسيدة بقى بيمد ايده على سيدة ودة من العجائب والطرائف هذه الايام ورغم كده ايدة لا بتهش ولا بتنش ولا بتصيب اهى هيصه والسلام
طبعا شئ طبيعى ظهور مثل هذه الشخصيات فى فى كل مواسم الانتخابات فالخير موجود والشر ايضا موجود والصالح موجود والطالح موجود حتى يوم القيامة لكن ياعم عبد الله بن سلول ولا ياسى عبدة مشتاق ولا انت يادوبلير الغبرة وسياده وهبة السوالمى الانتخابات لها اصول وقواعد وحسابات تانية خالص غير فكركم ومنهجكم اول حاجة تحافظوا على كرامتكم اولا علشان الناس بقت عارفه كل واحد على اية وثانيا من حقكم انكم تترشحوا فى الانتخابات كما تريدون ده حق اصيل ومتاح دستوريا وعمليا لكن عيب انك تدخل تمثل الناس فى البرلمانات او النقابات او حتى الاندية وتكون لامؤاخذة دلدول ولا طرطور ولا امعه فى ايد اى حد كان يحركك يمين وشمال ويطلع فوق وينزلك تحت يعنى حضرتك لعبة فى ايد البهوات بذمتك ينفع تمثل الناس وتبقى نائب فى البرلمان
خلى بالكم ياشخصيات الغبرة الانتخابات مش يفط بتتعلق فى الشوارع وامام اللجان ولا فلوس بتتوزع لشراء الاصوات ولا وعود كذابة وخداع ومكر لا الانتخابات كرامة وشخصية وشعبية وحب الناس الانتخابات لها اساس وقواعد وجذور والناس النهاردة اصبحت بتميز عبد الله بن سلول او عبده مشتاق او البيه الدوبلير ولا وهبه السوالمى مهما تجملوا او تزينوا او دفعهم وساعدهم اى اشخاص هم معروفين ومصيرهم دائما الى زوال لانه لا يصح الا الصحيح
كل واحد يعيد حسباتة ويراجع تفكيره ويعرف قيمتة ولا يبيع كرامته واستغل حقك الدستورى صح اترشح يامرحب بس بلاش تكون عبد الله بن سلول ولا عبده مشتاق ولا دوبلير مدفوع واوعى تكون وهبه السوالمى وعمر الاموال ما بتصنع انسان ابدا
مش كده ولا ايه
