مهزلة تحدث لأطباء الامتياز بالقصر العيني دفعة ١٩٣
زمايلنا اتوقفوا عن العمل عشان بنحكي مشاكلنا !!

النهارده ١٥/٤ نزل قرار بوقف ٨ اطباء امتياز في مستشفيات جامعة القاهرة عن العمل بدون اي سبب واضح او حتي تحقيق معاهم

زمايلنا كانوا بيكتبوا علي صفحتهم الشخصية بدون اي تعدي علي حد ولا تشهير ولا حتي دعوه لاي فعل خاطئ

يعني بدل ما حد يسمعهم و يحاول يصلح بنتحول للتحقيق !

اي القصة من الأول؟
احنا أطباء امتياز دفعة 193 القصر العيني
بعد خمس سنين تعب ومجهود في الكلية وضغط مذاكرة وامتحانات خلصنا سنين النظري واستلمنا عملنا رسميا كأطباء امتياز في مستشفيات جامعة القاهرة اكبر صرح طبي في مصرنا الحبيبة وكلنا أمل اننا نكون جزء من المنظومة العظيمة دي اللي بتخدم أهلنا في مصر كلها وبتقدملهم الخدمة الصحية
بس للأسف من اول يوم نزلنا نستلم فيه العمل اتصدمنا بطوابير ملهاش آخر قدام بصمة الحضور واللي ممكن تخلينا ننتظر نص ساعة او اكتر قدام جهاز البصمة عشان نقدر نبصم .. للأسف الموضوع ده مكانش اول يوم بس ولكنه مستمر لحد دلوقتي .. كل يوم طابور ممكن ما تشوفش اوله من آخره من أطباء الامتياز قدام البصمة مستنين دورهم عشان يبصموا ! .. وطبعا ده كله على حساب تأخرهم عن القيام بمهامهم وواجباتهم المطلوبة منهم في المستشفى
ويا ريت الموضوع خلص لحد هنا .. لا لقينا اننا مش بس مطالبين ببصمة الحضور الصبح .. لا احنا برضو مطالبين اننا نستنى ٨ ساعات عشان نرجع نوقف نفس الطابور بنفس الزحمة عشان نبصم بصمة الانصراف حتى في الأيام اللي مفيهاش شفتات (نوبتجيات)

طيب في خلال ال ٨ ساعات اللي انا هقعدها دي في الأيام اللي ما عنديش فيها نوبتجية هل انا مطلوب مني أي عمل؟
لا
طيب هل في اي برنامج تدريبي معين في الأيام دي؟
لا
طيب هل متاح لينا أماكن نستنى فيها عدد الساعات ده كله؟ خصوصا ان في بعض الايام احنا لازم ننزل نبصم فيها بالليل بعد الساعة ١٠؟
لا
طيب لو قررت مثلا انزل اتعلم في الطوارئ وأقف مع الدكاترة الكبار على العيانين بحيث أحاول استفيد في الساعات اللي انا قاعدها دي هل ده متاح؟
للأسف بيتم طردنا من المستشفى بحجة اننا أطباء امتياز ومش مسموحلنا نوقف هنا حتى لو لمجرد المشاهدة ..

الكلام بيتقال اننا في الحضور والانصراف زينا زي الموظفين .. طيب مش مشكلة هل احنا بنقبض مرتبنا اللي اللي أقره قانون 153 لسنة 2019 والذي ينص على أن مرتب طبيب الامتياز يعادل 80% من مرتب الطبيب المقيم اللي هو 7000 جنيه؟
لا للأسف .. وبنقبض 2800 جنيه فقط دون مراعاة لزيادة الحد الأدنى للأجور
طيب يبقا كده احنا بننزل 4 أيام في الأسبوع بنقضي في كل يوم 8 ساعات متواصلة ما بين بصمة الحضور والانصراف من غير أي مهام فعلية موكلة إلينا .. ولمجرد ان الادارة تعرف اننا “حضرنا وخلاص” من غير الحرص على وضع اي برنامج تدريبي جاد نتعلم فيه كويس عشان لما نتخرج نقدر نتعامل مع المرضى في الوحدات الصحية والمستشفيات بشكل كويس

طيب الأيام اللي بيبقا عندنا فيها شغل ونوبتجيات غير الأيام دي هل بنتعلم فيها تعليم حقيقي؟
للأسف لا .. احنا بنعمل مهام أغلبها مهام تمريض وعمال وملهاش صلة
بالطب، زي حجز أكياس الدم وتحاليل المعامل وغيره ..

بعد شهر ونص من تعسف الإدارة وعدم رضاها بسماع أي شكوى مننا .. ولو كان حد بيحاول يطلع بشكوى خطية مكتوبة بيتم رفضها على الفور حتى من غير النظر فيها او في محتواها .. لما لقينا الوضع غير محتمل طالبنا الإدارة في منشوراتنا على وسائل التواصل بكل أدب واحترام اننا عاوزين نلغي بصمة الانصراف عشان عالأقل نعرف نستكمل حياتنا بشكل عادي زي ما اتلغت من فترة بسيطة لزمايلنا في طب عين شمس وقدروا يقدموا شكوى يلغوا بيها بصمة الانصراف ..
وطالبنا بوضع برنامج تعليمي واضح لينا يضمن فيه اننا ناخد تعليم كويس يليق بمستوى خريج طب قصر العيني ..
……………….
لكن للأسف بعد الطلبات والشكاوي اللي اتقدمت لإدارات المستشفيات والهاشتاجات وازاي بنعاني وازاي النظام المجحف ده بيأثر بالسلب علينا وبيمنعنا من التعليم الحقيقي
وبوستات مفيهاش أي كلمة إساءة واحده لأي مسئول ولا أي جهة ..غير اننا بنعبر وبنقول اننا عاوزين نظام إداري يراعي ظروفنا وبرنامج تعليمي عادي
نتخيل بقا رد إدارة المستشفى هيكون إيه؟
ايوا بالظبط زي ما انت شايف.. تم ايقاف بعض من زمايلنا عن العمل ((ككبش فداء)) للي بيحصل وتحويلهم للتحقيق بمبدأ اننا هنخوفكم بيهم عشان تسكتوا
ولما راح بعض زمايلنا للإدارة عشان يعرفوا هما ليه اتوقفوا عن العمل تم التعامل معاهم بأشد درجات القسوة وإهانتهم وتم تبليغهم بأنه تم إيقافهم عن العمل وتحويلهم للتحقيق وتخويفهم بأن مستقبلهم المهني في خطر! .. والتهمة أنهم دعوا الناس للاعتراض والناس مشيت وراهم! .. والحقيقة انه سواء احنا او زمايلنا ((قدمنا طلباتنا بكل احترام)) وبدون اي تعدي على حد ولا تشهير ولا اضراب ولا دعوة للتجمهر ..

ومع ذلك الإدارة مصرة تطلعنا غلطانين ((وتجبرنا اننا نعتذر عن المطالبة بحقنا)) وبتحاول كل شويه تخوفنا بحد من زمايلنا عشان نسكت!

صباح الخير يا قصرنا العيني
بس احنا مكملين للآخر وهنفضل نطالب بحقوقنا كأطباء امتياز في مستشفيات جامعة القاهرة