بصرخ و صرختي
مكتومة
و ناديت لحد
مانهد الحيل
لاحد خد بإيدي
و لا قادر أمدها
للغير
يا دنيتي اللي
عشتها أوهام
لا طولت أعيش
فيكي غني
و لا طولت أعيش
غلبان
أحلام ورا أحلام
عايش على حسها
الأيام
كانت زمان
على قدنا الأحلام
لا كنا نبص للي
ف إيد غيرنا
و لا قولنا يوم
إشمعنا
كنا بنحلم بدار
سقف و اربع
حيطان
و اللعبة عروسة
و حصان
و البيت بالخير مليان
من كد اليدين
لا اعتمدنا علي غيرنا
و لا كنا نستجدي
اللقمة
و نشرب م القلة
لا فلاتر سبع مراحل
و لا مراوح و تكييف
يخفف حر الصيف
كان لبس المدرسة
شنطة و مريلة
و العلم ف الراس
و الكراس
و حصة المدرسة
أساس
بقت المدارس
اوض فاضية
خالية من روادها
و عملنا الكتاب
قرطاس
طالت غربتنا
و توهنا عن روحنا
و ماعدنا نعرف
للبساطة عنوان
عيونا مكفوفة
و إيدينا بالحنة
منقوشة
حاجات كتير كتير
اتغيرت فينا
و أحلامنا بتلعب بينا
يا أحلامنا يا مهووسة
وخدانا على فين ؟
اللي عنده حاجة
عاوزها اتنين
بلاش نخذل أحلامنا
بلاش طموحنا
يفلت منا
نصبر على روحنا
و نزرع أحلامنا
صبار فدادين
الدنيا ماتخلقتش
ف يوم
و لا ف يومين
الدنيا ماتخلقتش
ف يوم
و لا ف يومين
