حسين فهمي اتجوز مراته الأولى نادية محرم وهو عنده 24 سنة، وبقى أب وهو عنده 25. رجع من أمريكا وخش السينما بقلب جامد. وكان عنده مبدأ غريب: لو بيمثل فيلم رومانسي لازم يحب البطلة ويعيش معاها قصة حب ورا الكاميرا عشان يعرف يبان قدام الكاميرا.
لما عمل فيلم نغم في حياتي وقفت قدامه النجمة ميرفت أمين، حبها، وبعدها مثلوا سوا في رغبات ممنوعة و الأخوة الأعداء، وابتدى يحس ناحيتها بإعجاب، بس كان وقتها متجوز. هو بيعترف إنه “بتاع ستات”، لكن برضه بيعترف إنه مخلص جدًا وعمره ما خان واحدة حبها.
ولما الإشاعات طلعت عن علاقته بميرفت، كان بيرجع البيت متعذب وهو شايف مراته متأثرة ومجروحة. مكنش فيه حل غير الانفصال بعد 14 سنة جواز، ومراته أخدت العيال ورجعت أمريكا.
بعدها اتجوز ميرفت أمين، وصورتهم يوم الفرح وهو بيرفع الطرحة من على وشها نزلت غلاف كل المجلات، وبقت بوستر في بيوت المراهقات. كمان اتاخدت لقطات حقيقية من يوم الفرح وحطها حلمي رفلة في فيلم مكالمة بعد نص الليل وهما طالعين فيه جوزين، ودي كانت لقطة نادرة في السينما المصرية إن جواز حقيقي لفنانين يظهر في فيلم.
جوازهم كان هادي جدًا، وكانوا بيسيبوا النجومية برة البلاتوه. خلفوا “منة حسين فهمي” اللي هي البنت التالتة لحسين فهمي والوحيدة لميرفت. عمرهم ما تدخلوا في شغل بعض، لدرجة إنهم بعد الجواز ما مثلوش مع بعض غير في فيلم واحد اسمه آسفة أرفض الطلاق، واللي تقريبًا كان وشه وحش عليهم، لأنهم اتطلقوا بعده فعلاً بعد 12 سنة جواز.
