جريدة الاخبارية سياسية::شاملة::مستقلة
مقالات مشابهة
أصعب خسارة إنك تخسر إنسان كان نفسه يفضل جنبك!
في ناس لما بتبعد عن حياتك، بتسيب وراها وجع أكبر بكتير من المسافة اللي بينك وبينهم.. مش لأنك مش قادر تعيش من غيرهم، لكن لأنك كنت بتتمنى تعيش معاهم.
في ناس خسارتها مش سهلة، ناس كانت بتسامح من قلبها، وتعدّي، وتستحمل، وتدور على ألف مبرر عشان متخسرش اللي بتحبه. ناس كانت بتصالح حتى وهي موجوعة، وبتطبطب وهي محتاجة اللي يطبطب عليها، وبتختار الكلام الحلو وهي جواها عتاب يكفي عمر كامل.
المشكلة إننا ساعات بنفهم قيمة الناس بعد ما بيتعبوا ويمشوا. بنفتكر إن طيبتهم ضعف، وإن تسامحهم حق مكتسب، وإن وجودهم مضمون مهما حصل.
لكن الحقيقة إن أطيب الناس مش ملايكة، دول بشر، عندهم طاقة للتحمل، وليهم قلب مهما كان كبير ممكن يتكسر.
وأصعب لحظة مش لحظة الخناق ولا الزعل، أصعب لحظة لما الإنسان اللي كان بيجري عليك عشان يراضيك، يبطل يجري. لما اللي كان بيحاول يشرحلك وجعه يسكت، واللي كان بيطلب منك متبعدش يقولك: خلاص، براحتك!
ساعتها متفتكرش إنه مبقاش بيحبك، يمكن هو لسه بيحبك، بس اكتشف إن الحب لوحده مش كفاية عشان يفضل في علاقة بتوجعه.
وفي ناس بتخرج من حياتنا وهي شايلة جوانا ذكريات حلوة، بس كمان شايلة خذلان عمره ما هيتنسي.
خلي بالك من الناس اللي بتخاف تخسرك، لأن مش كل اللي بيمشي بيكون نسيك، ومش كل اللي سكت ارتاح، ومش كل اللي قالك خلاص كان قصده خلاص.
في خسارات بتوجع الطرفين، بس طرف بيعيط وهو ماشي، وطرف تاني مبيعرفش قيمة اللي خسره غير لما يمد إيده وميلقهوش.
وأوعى تستهون بإنسان كان بيختارك كل مرة، لأن ممكن ييجي يوم يختار نفسه لأول مرة… وساعتها حتى لو رجعلك الندم، مش شرط يرجعلك الإنسان.
بعض الناس خسارتهم مش بتتعوض، مش لأن مفيش غيرهم، لكن لأن اللي قدموه كان صادق ومش بيتكرر.
