– عيني عليك باردة ياسي السيد إيه الشياكة والحلاوة دي علي فين العزم إن شاء الله؟
– شامم في كلامك ريحة تريقة يا أمينة !
– أبدا وحياتك ياسي السيد استني كمان أقوم أجيب شوية بخور علشان أرقيك من الحسد !
– حسد إيه بس يا أمينة وحايحسدونا علي إيه هي الحكومة خلتلنا حاجة علشان نتحسد عليها؟
– علي رأيك قال حاسدين الغجر علي ضل الشجر بس بلاش تدخل الحكومة في الموضوع وقوللي بصراحة رايح فين ؟
– مشوار صغير كده وراجع علي طول.
– حاتخد العربية ولا حاتركب مواصلات؟
– عربية إيه ياولية مانتي عارفة يا أمينة من ساعة غلا البنزين وأنا راكنها..أنا رايح بمترو الأنفاق!
– مترو الأنفاق؟ تبقي مش راجع ياسي السيد..اوعي تكون بتفكر في الانتحار ياخويا..حرام عليك ياراجل دي الحياة حلوة برضك وبعدين مش فيه مسئول قال إللي عايز ينتحر يروح ينتحر بعيد عن المترو مش ناقصة عطلة؟.
– افهميني يا أمينة أنا مش رايح أنتحر أنا رايح أركب المترو علشان زي مانتي لسه قايلة بعضمة لسانك الحياة حلوة.
– ماتوضح كلامك ياخويا وتفهمني قصدك إيه؟
– سما المصري ياستي عايزة تعمل أكشاك في محطات المترو اسمها الحياة حلوة تقابل فيها الناس اللي عايزة تنتحر يمكن تقدر تقنعهم ماينتحروش.
– قول كده بقي..يعني الشياكة إللي انت فيها ي علشان عايز تروح تقابل سما المصري؟
– ياولية بلاش سوء ظن وافهمي.
– أفهم إيه ماهو علي وشك يبان يانداغ اللبان هو إحنا ماصدقنا ربنا تاب عليك من جليلة وزبيدة تقوم تطلعلنا ست سما المصري؟هي الولية دي عايزة مننا إيه بالظبط؟
– انتي غيرانة منها ولا إيه يا أمينة؟
– أغير منها ليه إن شاء الله أحلي مني ولا أحلي مني؟
– خلاص بلاش نفسنة ومتعطلنيش خليني ألحق أروح وأرجع قبل صلاة الضهر.
– أنا نفسي اعرف الست دي مالها حاشرة نفسها في كل حاجة حتي لو ملهاش فيها،يعني انتخابات مجلس شعب عايزة تقدم وكل رمضان تقول انها حاتقدم برامج دينية وبعد وكستنا في كاس العالم قالت إن نفسها تدرب المنتخب وكله كوم وحكاية الحياة حلوة دي كوم تاني تكونش فاكرة نفسها ينبوع حنان مثلا ولا حاجة؟
– ياستي وماله لما تكون ينبوع حنان وعايزة تعمل حاجة للغلابة دي ست إيجابية ونفسها تخدم البلد!
– دي اسمها عين فارغة وحب ظهور في الفاضية والمليانة وأتحداك لو كانت هي عايزة تعمل ده بجد.
– لا طبعا جد بدليل انها قابلت فعلا المسئولين في المترو علشان تنفذ الفكرة بتاعتها.
– هي قابلت المسئولين بسهولة كده وانت بقالك شهر مش عارف تقابل رئيس الحي علشان مشكلة المجاري اللي طافحة في الشارع ليل نهار؟
– اصطبحي ياولية وغوري من وشي بقي وعلي الله ارجع ألاقيكي ماخلصتيش الأكل!
– مش طابخة وابقي هاتلنا معاك أكل جاهز من المطعم.
– مطعم إيه ياولية؟
– مطعم اشبع وادعيلي جنب كشك الحياة حلوة بتاع ست سما المصري علي طول!
