عجيبه امر هذا البلد اليس لحكومتنا الرشيدة برنامج للخدمات مرتبط بزمان ومواعيد للتنفيذ وخطة موضوعة بعدل للتنفيذ بين البلاد ام لابد ان يتحرك الناس ويروح النواب وهات ياصور وهات يا تنفيذ وكان تنفيذ الخطط عشوائى بل ووضع الخطط عشوائى وحسب المزلج هى خطط الخدمات مولد وصاحبه غائب واللى يلحق يلحق يجيب له نائب ويروح للوزير او البيه المسئول ويتصوروا ويتحرك الباشا او البيه المسئول وينزل وهات يابث وتصوير واذلال للناس هل وصلنا الى هذا الوضع فى مصر بلا خجل او طموح او عدل فى التنفيذ ام ان كل ما يجرى يكون فعلا طبقا لخطه حكومية موضوعة ولكن يتسابق النواب فى التصدر للمشهد من باب انا موجود وانا اللى جبت وانا اللى عملت وخاصة اقتراب موعد الانتخابات وفى هذا ضياع لحق حكومتنا الرشيدة ده اذا كان ذلك حقيقى والا لماذا تسكت على تصرفات بعض النواب الغير مسئولة عن استغلال خطة ومجهود الحكومة فى تقديم الخدمات للقرى والنجوع ومختلف البلاد هذا يمثل سرقة سياسية لمجهود الاخرين وده فى حد ذاتة عيب بل يصل لحد التحريم
نجد قرية تستغيث وتصرخ وتنشر عن مشكلة حقيقية عندهم يعانون منها دون ذكر اسماء ولاحياة لمن تنادى صم الاذن وعمى العيون من السادة المسئولين عن هذه المشكلة وكان الناس لا تعنيهم ولا اننا فى دولة تحترم البشر وتسعى لحل مشاكلهم وفجاءة وبذكاء يلتقط نائب الصورة ويتفضل مشكورا ويزور القرية ويلتقى باهلها وسط لافتات الترحيب والامتنان والتصوير وهذا حقة ثم ينتقل للفصل الثانى من المسرحية ويذهب الى البيه المسئول ويقدم طلبات الاهالى وكانه لم يسمع عنها ولم يراها ولم يبلغة اى حد عن المشكلة فينزعج فى مشهد تمثيلى ولا فريد شوقى فى قوته او عادل امام فى كوميدياتة ويقول ازاى ويتحرك وينزل ويصدر التعليمات طيب كنت فين حضرتك قبل كده مسمعتش استغاثة ولا صراخات الناس ولا لازم النائب ييجى لحد الباب ويخبط ويدخل ويعرفك للاسف انت كده لا تنفع تكون مسئول ولا تنفع تقعد على كرسىيك اللى بيلف ويدور وخسارة فيك التكييف والسيارة والسكرتارية لانك لا تصلح لشغل هذا الموقع
المسئول لازم يكون على قدر المسئولية بدون تدخل من احد نائب كان او واسطة لابد ان كل واحد يعرف اللى علية واللى له ولازم حكومتنا الرشيدة تعرفنا هى خططها طبقا لرغبات النواب ولا هى موضوعة فى برنامج محدد وعادل ولا هو لازم تذلونا وتصورونا وكانكم بتمنوا علينا وسلمتونا تسليم مفتاح للسادة النواب ربنا يبارك لنا فيهم نيام نيام ثم قيام قيام مع اقتراب موعد الانتخاب والشعب لا هو اهبل ولا غبى لا الشعب فاهم وعارف كل حاجة لكن مكبرين دماغهم والسلام
هى خطة حكومية ولا فهلوه برلمانية وتصوير وهتافات ولا ايه بالظبط افيدونا افادكم الله من حقنا نعرف
مش كده ولا ايه
