من سنين طويلة كنا بنعمل الجزء الاول من برنامج “حيلهم بينهم” ، اللي بعتبره افضل جزء اتعمل بجد من الاجزاء الكتير اللي اتعملت من البرنامج دا ، لان وقتها بجد مكناش بنقول للضيف عن المقلب اللي كان طبيعي جدا وبدون تمثيل ، وخاصة أن المذيع والفنان عمرو رمزي محدش من الفنانين كانوا يعرفوه في التوقيت دا .
المهم عمرو والمخرج اقترحوا عليا نجيب ابراهيم نصر ، وبالفعل كلمته قلتله احنا بنعمل برنامج اسمه “وجهة نظر” ، وعايزينك ضيف معانا ، ولما سألني عن طبيعة البرنامج قلتله ، احنا بنجيب ناقد أو فنان قريب من حضرتك يقول وجهة نظره فيك ، وكمان بنستضيف ناس عادية من الشارع بيتكلموا عنك ، وبنعرض التقارير دي عليك وبنسألك كام سؤال تاني ، قاللي يعني مش مقالب وكده ، قلتله عيب عليك ، هو احنا نقدر نعمل مقلب في ملك المقالب .
المهم وافق ، ووقتها رشح الزميل والصديق والاخ العزيز علي قلبي الصحفي الراحل محسن محمود علشان يتكلم عنه ، وبالفعل كلمت محسن الله يرحمه ، وقابلته كان لسه ساكن في شقة عزوبية قبل ما يتجوز ، وصورت معاه تقرير بعد ما فهمته اننا بنعمل مقلب في ابراهيم ، وبنصور جزء من التقرير بتقول عليه كلام مش كويس ، وبترجع تقول في الجزء التاني انك كنت بتهرج معاه ، وافق محسن الله يرحمه.
وفي نفس اليوم حضر الراحل ابراهيم نصر لمكان تصوير البرنامج في فيلا اعتماد خورشيد بالهرم ، لكن بحسه الكوميدي قاللي بقولك ايه يا عزوز انا مش عارف ليه حاسس انكم هتعملوا مقلب ، وخاصة لما لقي عمرو رمزي بيعامله بتناكة من البداية علشان يستفزه حتى من قبل ما نبدأ تصوير بالفعل ، حاولت وقتها اقنعه أن دا برنامج عادي ، قاللي يا باشا انا حاسس واحساسي لا يمكن يطلع كدب ، وحاول يكلم محسن لكن كان تليفونه غير متاح ، المهم المخرج وقتها ومعاه عمرو قالوا طب ما نقوله علي طبيعة المقلب علشان هو كده كده مش راضي ييدأ تصوير ، وساعتها ممكن يوافق ويعمل معانا حلقة جامدة .
بالفعل بلغناه ودي كانت الحلقة الوحيدة في الجزء دا اللي نقول للضيف علي طبيعة المقلب قبل ما يصور ، وقتها قال لا اعذروني مش هصور طبعا ، لان ببساطة شديدةمعظم الناس اللي قاعدة تتفرج علي التليفزيون ، ممكن يشوفوا الجزء اللي بيشتمني فيه محسن وباقي جمهور الشارع ، وبعدها ممكن الناس اللي بتتفرج علي الحلقة واحد يقوم يشرب والتاني يدخل الحمام والتالت يجيب صينية الكنافة من المطبخ والام بتصوت لعيالها ومحدش في النهاية يسمع الجزء اللي بيقول فيه محسن أنه بيضحك معايا وان جمهور الشارع اللي قال عليا فنان زي الزفت هيرجعوا يقولوا معلهش احنا بنهرج .
واعتذر وقتها ومصورش الحلقة ، لكن بقيت علاقتي به ممتازة حتى وقت قريب حينما اتصلت به ونفى شائعة وفاته ، وكان كل ما نتكلم يقوللي برضه يا بنا معرفتش تعمل مقلب فيا .
زي النهاردة رحل ابراهيم نصر صاحب القلب الطيب ، ليلحق بزميلنا وصديقنا محسن محمود .. ربنا يرحمهما ويصبر أهلهما .
