موضوع مهم جدا في حياة كل شخص فينا سواء في حياته الوظيفية أو الاجتماعية أو المالية أو أي نوع تاني …

تحليل_المخاطر. #Risk_analysis

المخاطرة دي طبيعة اتخلقنا بيها ومن أهم الصفات الموجود في الإنسان ولكن بنسب مختلفة والصفة دي هي سبب نجاح أو فشل اي شيء بنتعرضله.
اي شركة بكل مجالاتها لابد فيها من عمل تحليل للمخاطر في دراسة الجدوى وفي عمليات الإنتاج لأنها سبب في استمرار وتطور الشركة أو سبب في خسارتها وتدميرها.
نفس الحكاية في حياة الشخص نفسه محتاج يعرف يحلل المخاطر اللي ممكن يتعرضها بشكل واقعي ولكن للأسف كتير بيغفل عنها.
ازاي تتعامل مع شخص أو كيان أو حدث بيهددك أو متوقع حدوثه.
ازاي تمشي في طريق هدفك وانت عارف تعدي من العقبات بسهولة وغيرك بيصطدم بالواقع.
ازاي الشركة بتقرأ الحدث المستقبلي قبل حدوثه وبتتجاوز مطباته.
ازاي تمشي في طريق وانت عارف أنه مكسر وعامل حسابك رغم انك ما مشيتش فيه قبل كدة وتعديه وغيرك بيقع فيه.
ازاي قلبك يبقى قوي وجرئ وتكسر الخوف رغم أن الموقف في ظاهره مرعب ومخيف.
ازاي فيه ناس بتعرف تحدف نفسها من الطيارة زي المظلات أو تتسلق الجبال أو تسوق بشكل جرئ في الطريق بسرعة ١٢٠كم مش خايفين وناس تانية تخاف تنط من السرير للأرض وناس بتمشي بالعربية في اليمين بسرعة ١٠كم وخايفين يتخبطوا…
كل ده واكتر من كدة بيحدده دراسة وتحليل المخاطر والتهديدات المتوقعة..
طب ازاي نعرف نحلل المخاطر ونديرها ونتحكم فيها قبل حدوثها؟!
١-أولا وقبل اي شيء لازم تعرف نقاط قوتك وضعفك كويس جدا بدون مبالغات
٢-لابد من تنحية الجانب الحسي والعاطفي في التفكير والدراسة
٣-تحديد الفرص اللي متاحة ليك.
٤-تحديد التهديدات المتوقعة تفصيليا وهي دي موضع الدراسة اللي بنتكلم عنها.
تحديد المخاطر أو التهديدات فيها تهديدات #داخلية لو على المستوى الشخصي مثلا صفة الطول او القصر أو البطئ أو العجز …. ولو على المستوى المؤسسي مثلا العمالة غير المؤهلة أو معدات الفرز او الاستلام أو الإنتاج أو التخزين غير صالحين أو الوضع المادي سيء …
وتحديد المخاطر أو التهديدات #الخارجية على سبيل المثال التغيرات المناخية زي السيول اللي حصلت قبل كدة أو تغيرات صحية زي الكورونا أو اقتصادية أو سياسية …..
ولا بد من توقع و معرفة رد الفعل الناتج عن كل تصرف هنعمله وأقصى تأثر به وقراءة النتيجة قبل حدوثها من تجارب سابقة أو استحداث تجارب جديدة مشابهة للواقع ومن هنا نقدر نعمل خطة مواجهة الأزمة قبل وقوعها.
كل دي قشور في علم تحليل المخاطر والاستفاضة فيها لاتنتهي.
وكتير مننا درس علم تحليل المخاطر وإدارة الأزمات بشكل أكاديمي وكتير مارس العلم ده بشكل عملي.
ولكن تطبيق العلم ده وممارسته هو السبب الرئيسي في النجاح والفشل والمكسب والخسارة والنجاة والإصابة.
وطبعا الحذر لا يمنع قدر ولكن الأخذ بالاسباب هي فريضة.
ومهما بلغت قوة تحليل وإدارة المخاطر وحل الأزمات فهي لا تصل إلى درجة ١٠٠٪ من التوقع والحل

كاتب المقال عضو مجلس ادارة نقابة الزراعيين ورئيس لجنة التوظيف