كتبت زينب الفيومي عبر صفحتها الشخصية علي مواقع التواصل الاجتماعي “فيس بوك” ردا علي ناهد ابو القمصان
أعتقد الكل رد عليكى وعلى كلامك الأهوج
حتى مشايخنا الاجلاء واخواتنا الأقباط
الكل رد عليكى ….
بس فى شوية حاجات نفسى يوصلولك وأتمنى لو متهربيش وتجاوبى على أسئلتي ليكي…
عم أبو القمصان هل كان بيدى فلوس للوالدة
علشان تتفضل بإرضاعك ؟!
عم أبو القمصان هل كان بيجبلك مرضعة تقوم
بإرضاعك الحليب حتى تشبعى وتترعرعى ؟!
هل الست الوالدة كانت بالفعل علشان تقوم بإطعامك
كان لازم عم أبو القمصان يديها مقابل مادى ؟!
هل كان بيت عم أبو القمصان فيه الخدم والحشم والمرضعات علشان الست الوالدة قالت مثلا
أنا مش ملزمة بأى حاجة ؟!
أنا بسألك علشان كلامك مش ممكن
يكون وليد يوم وليلة كده …..
عم {إبراهيم الفيومي} والدى بقى لما اتولدنا لقينا نفسنا فى وسط شركة بين طرفين
والدتى وعمك الدكتور إبراهيم ربنا يرحمهم ويكرم مثواهم لقيت الحقوق والواجبات بينهم متقسمة ( أوتوماتيك)
من غير ما يقعدوا ويصرحوا أو يكتبوا اللى ليهم واللى عليهم …ناس فاهمة يعنى إيه شراكة مدى الحياة …
ناس متقبلة العيوب قبل المميزات
والست ياست يابنت عم أبو القمصان كانت ملزمة بكل ما تحمله الكلمة من معانى …
كانوا بيسموها ربة البيت لأنها صاحبة البيت
والراعية المسؤلة الأولى عنه ….
الست كانت فاهمة يعنى إيه ست وفاهمة إن ربنا فى تكوينه لجسدها ونفسيتها مكنش بصورة عبثىة لا وحاشا لله …
كان لحكمة هتستمر معاها مدى الحياة
بتحمل وتسهر وتولد وترضع وتأكل بنفس راضية
عارفة ليه؟؟؟
لأن المنانة الحنانة مش ست دى حثالة المجتمع
ست يعنى سند مش ند …
ست تسند وتعين وقت الضيق والشدة
ست عارفة إمتى تكون ست البنات
وإمتى تكون بشخصية ١٠٠ راجل فى بعض
ست تكاتف أسرتها وقت المحن والضيق …
ست يعنى نور البيت من غيرها الدنيا تضلم ….
ست يعنى أم أبوهم قبل ماتبقى أم لأولادها
ست مش أجيرة تشتغل بالساعة علشان تتقاضى فلوس
على رضاعتها وحبها ورعايتها لولادها ….
ياست يابنت أبوالقمصان يا اللى مش ملزمة إنتى حرة
إحنا كبرنا لقينا الست والراجل بيتباروا بخدمتهم
لبيتهم وأسرتهم بدون انتظار مقابل لأن ربنا أمر بكده
تيجى إنتى على أخر الزمن فى الدنيا الصعبة على الأسر والبيوت تقولى الكلام المخذي ده
الله يهديكى لأنك مهما هتجنى شهرة أو تبقى تريند
نتيجة كلامك ده فياريت تعرفى إن فى يوم هتقفى فيه لوحدك أمام الملك …أمام الرحمن الرحيم ..أمام الله….
وهتتحاسبى على كل كلمة قولتيها صدقيني
ياريت تكون رسالتي وصلتلك
من زينب بنت إبراهيم الفيومي
ووصلت كمان لبت عم صالح اللي بتقول إنها
داعية قال ايه إسلامية
وبنت عم قطب اللي معرفش تصنيفها ايه هي كمان
وأحب أقولك جملة أخيرة ك {مرأة }
أنتي لا تمثليني كإمرأة في المجلس القومي لحقوق المرأة
لأن الله أعطى للمرأة حقوقها وكرمها وأفضل تكريم لها
أنها الأم والزوجة والأخت والإبنة والسند والوزيرة والسفيرة
وقبل كل ده …..
هي ربة الأسرة وعمود البيت ….
وهى أول وطن لكل إنسان……..
