الروس مش هما اللي بدأوا المعجنة الدامية دي ، الغرب بقيادة أمريكا هما اللي راحوا عند بيت الدب. الر.وسي على بعد آلاف الأميال وحاولوا يستفزوه ويجروا شكله وعايزين ينصبوا صواريخهم على باب بيته ، فلما الدب يغضب ويدافع عن عرينه، فما ينفعش تيجي انت هنا وتتحجج لي بمفاهيم سيادة الدول ومبادئ القانون الدولي .. كان فين القانون الدولي وأمريكا وأشياعها بينتهكوا سيادة العراق ويدمروا سوريا وليبيا وووو ويقتــلو عشرات الآلاف ويشردوا الملايين وينهبوا المليارات من البلاد اللي خربوها دي ؟ وكان فين مبدأ احترام سيادة الدول اللي بتطنطن بيه أمريكا دلوقت من اللي عملته هي نفسها أيام أزمة الصواريخ الكوبية في الستينات ؟
بالمناسبة ، أوكرانيا اللي الناس متشحتفة عليها و متعاطفة معاها دلوقت كانت من ضمن الدول اللي شاركت في التحالف الدولي لغزو العراق عام 2003 وجنودها ياما قتـلوا وسرقوا ونهــبوا وأغتـــصبـــوا أموال وأعراض العراقيين ، فمعلهش والنبي يا عم النحنوح المتعاطف ، نزل أجنحتك الملائكية دي شوية لأحسن هتطرف عيني
.
شايف محاولات لتلميع الرئيس الأوكراني «زيلينسكي» وتصويره كبطل قومي بيناضل مع شعبه لضمان استقلالية بلاده ، مع ان «زيلينسكي» ده هو نفسه اللي بقاله سنين بيستجدي الغرب وبيتوسل إليهم عشان يضم بلاده للاتحاد الأوروبي ولحلف الناتو ، يعني هو اللي عايز يجيب القواعد العسكرية الأجنبية ويزرعها في قلب بلاده على باب بيت الدب.الروسي ، في الوقت اللي الروس عمرهم ما طالبوه قبل كده بوضع قواعد عسكرية روسية على أرض بلده ، وكانوا قابلين وراضيين من 1991 باستقلال أوكرانيا وحقها في اختيار من يحكمها وبأي طريقة يشاء ، بشرط عدم التسبب في الإخلال بالأمن القومي الروسي ، يعني «زيلينسكي» ده لو كان حتى شخص عادي مش راجل سياسي ، وعارف يعني إيه جغرافيا سياسية ومذاكر بنص جنيه تاريخ بلده ومبادئ أمنها القومي ماكانش هيفكر أبدا بالطريقة دي
.
وأنت بتتابع أخبار ومشاهد الحرب، أوعى تنسى انه فيه حاجة اسمها الحرب النفسية والبرمجة العصبية، وخصوصا إن أمريكا والغرب بصفة عامة هما ملوك السينما والميديا وأغلب الفضائيات ومنصات السوشيال ميديا تبعهم ، فبلاش تنساق خلف الإعلام الغربي والجزيرة وقنوات الدقنجية غلمان وشباشب الأمريكان و تنخدع بشغل الصعبانيات والإسطوانة المشروخة بتاعة حقوق الانسان والصور المفبركة اللي مسرحين بيها لجانهم على السوشيال ميديا ..دا نفس أسلوبهم اللي شغالين و بيخدعوكم بيه بقالهم عشرات السنين.. فأرجوك يا صديقي العزيز ، خليك عقلاني في الحكم على الأمور، واركن العاطفة على جنب شوية، فلا وقت للعاطفة فى مثل تلك الأمور ، وفي النهاية الحرب دي مش احنا اللي قومناها ولا احنا اللي نقدر نوقفها ، ومفيش حد في الكوكب قادر ولا يقدر يوقفها ولا يرجع «بوتين» عن اللي في دماغه، والقوى العظمى كلها في العالم زي ما انتوا شايفين واقفة تتفرج..
.
بالنسبة بقى للناس اللي بيقولوا اننا من رجالة «بوتين» على السوشيال ميديا ولجان الـ «K.G.B» الالكترونية والمشتاقين لعودة الجيش الأحمر والكلام العبيط الخايب ده .. «بوتين» مش قريبي ولا جوز خالتى ولا بيقبضني فلوس ،، وأصلا الروس دول أبخل خلق الله ، بس في المواقف دي مفيش مجال للعواطف ، واحنا دلوقت أمام واحد بيدافع عن أمن بلاده القومي، وده حقه ، بل وواجبه كرئيس تجاه بلده ، ولو ماعملش كده يبقى خاين وبيفرط في أمن وسلامة شعبه
.
أخيرا .. لا تعتقد أن تلك الحرب ليس لها علاقة بنا ، بالعكس ، الموضوع ده بيمس أمننا القومي ، لأنه على ضوء نتائجه سيتحدد شكل خريطة العالم الجديد وتوازنات القوى فيه ، وما يحدث هناك على الأرض الجليدية البيضاء سيتأثر به المواطن المصري البسيط هنا على الأرض الطينية السوداء.
