احنا جيل شاف العربية ب ٢٠٠٠ جنيه ، وشافها ب ٦ و ٧ مليون جنيه.
وشفنا الشقة التمليك ب ١٠٠٠٠ ج وشفناها فى الكومباوند بـ 20 مليون جنيه.
فدان الارض شفناه بـ ٥٠٠٠ جنيه ودلوقت بــ ٢ مليون.
رغيف العيش كان بقرش صاغ ويكفي أربعه ودلوقت بجنيه ونص وكله لقمتين.
اشترينا الحاجة الساقعة بقرشين ودلوقت بــ ١٥ جنيه.
البيضة كانت بقرشين ودلوقت بــ ٦ ج.
كان سعر لتر البنزين بــ ١٠ صاغ ودلوقت اللتر بــ 17 جنيه.
شفنا رئيس بيحكم 30 سنة ورئيس بيحكم سنة وحده.
وجيلنا شاف الفن والأدب والفكر على أصوله ودلوقت بيشوف فن وفكر قلة الأدب من غير أصول طبعا..
جيل شاف صالح سليم في الملعب والفريق مرتجي رئبيس نادي وكابتن محمد لطيف بره الملعب بيذيع المباراة في الراديو والتليفزيون.
جيل كان يسمع الأخبار والمسلسلات والمنوعات وغيره في الراديو قبل ظهور التليفزيون، كنا نروح السينما علشان نشوف فيلم، ودلوقت الشاشات بأنواعها بتعرض كل حاجة في الدنيا.
واحنا برضه الجيل اللي شاف أم كلثوم وعبد الحليم حافظ والسنباطي ومحمد عبد الوهاب والقصبجي وزكريا أحمد, وحتى الرقص شاف تحية كاريوكا وسامية جمال وكمان شاف الأفلام اللي أثرت في فكر ووجدان المجتمع لنجيب الريحاني وأمينة رزق وفاطمة رشدي وآسيا ويوسف وهبي وعماد حمدي وأنور وجدي وحسين رياض وكمال الشناوي و1000 فنان أصيل وفنانة، ودلوقت مفيش غير سما المصرى و ومحمد رمضان وحمو بيكا وأوكا وأورتيجا وسعد الصغير وبلاوي ملهاش أول من آخر.
جيل سمع أراك عصى الدمع وذكريات ورق الحبيب والأطلال وست الحبايب ولا تكذبي واسمر يا اسمرانى وسمع دلوقت مابلاش من ده يا حوده والإسفاف شكلا وموضوعا.
جيل سمع فيروز ونجاح سلام وليلى مراد وفايزة أحمد ونجاة وغيرهم، وسمع برضه ما بلاش اللون ده معانا، وحديثا في المقدر أديك ف الارض تفحر واديك ف السقف تمحر واديك ف الجركن تركن واديك ف الحاره ترغرط واديك تلبس نظاره ……
احنا جيل شاف طه حسين وعباس العقاد ويحيى حقي ويوسف إدريس وغيرهم من أساطين الفكر والقلم، وشاف برضه أسامي ما تعرفش بيكتبوا إيه بالضبط.
واحنا الجيل اللي اتعلم أفضل تعليم ببلاش طول عمره ، ودلوقت التكلفة بالملايين لتعليم ضعيف ساذج.
واحنا الجيل اللي عاصر 3 حروب كبرى في مصر 1956 و 1967 و 1973 ده غير الحروب ضد ميليشيات وعصابات الإرهاب على مدى السنوات لغاية دلوقت
ودلوقت الحروب والمعارك الكبيرة خيالات تتحرك في الموبايل والتابلت واللابتوب.
وياما شفنا حاجات وحاجات وحاجات وشفنا برضه عكسها وعكسها وعكسها ولا يخلص الكلام.
علشان كده احنا متأكدين إن التاريخ هايحتار فينا .. زي احنا كمان ما احترنا فيه وحيرنا معاه.
