على راى المثل الفلاحى من ايام جدودنا اللى كانوا بيفهموا ويعرفوا يعبروا رغم ان زمان كان الجهل منتشر والمعلومات بسيطة ومكنش فيه لا كمبيوتر ولا نت لكن كان فيه عزة نفس وكرامة واخلاق وتقدير ومراعاة ظروف الناس بعضها لبعض
المثل الفلاحى لاجدادنا كان بيقول الميت كلب والجنازة حارة كان بيضرب هذا المثل حينما تخرج الامور والاعمال عن مفهومها الحقيقى وقدرها المناسب والملائم لها ولا تراعى احترام عقول الناس ولا ظروف الناس وتبالغ الاحداث عن معناها الحقيقى وقدرها وثمنها
اليوم نرى الميت كلب والجنازة حارة واللى يزعل يزعل رايئ وانا حر فيه وملتزم حدود الادب وعدم ذكر اسماء ولكن المثل لعامة الناس فى جمهورية مصر العربية وما نراة من مؤتمرات باهظة التكاليف مؤتمرات تتسم بالفزلكة والفشخرة وحب الظهور والتصويرات مؤتمرات يرتدون فيها احدث الموديلات من البدل غالية الثمن واربطة العنق الغالية والورود الحمراء والصفراء فى الجيوب وكاننا فى حفل زفاف كبير
وعند الانبهار والسؤال للاسف يضحكوا علينا ويردوا بسخافة واستخفاف ويقولك ده مؤتمر انتخابى لمين ياعم لمرشحى القائمة والفردى للاحزاب طيب ليه ياسيدى هى دى انتخابات دى تكليفات واختيارات والثعلب فات فات وفى ديله سبع لفات سبعة قائمة وسبعة فردى والثعلب فات بيهم وخلاص لزومها ايه المؤتمرات والتكاليف واضاعة الجهد والمال وانشغال الناس
هو حرام نبقى طبيعيين وحرام نوجه الاموال دى كلها بضخامتها الى مشروعات تخدم الناس هو لازم نستكمل مسرحية كوميدية اسمها انتخابات الشيوخ ونزينها بمؤتمرات وسرادقات ولافتات كاذبة ايوة عارفين انمك بهوات ومعاكم اموال ربنا يزيدكم بس احترموا الناس واحترموا رغبات الناس وقدروا ظروف الناس اللى مش لاقية ولا عايزة انتخابات ولا فشخرات عايزة لقمة عيش حاف
انتخابات ايه يابهوات الاحزاب طبعا لكم حق فلوسكم كثيرة ولميتوا لم كثير وانتفخت الجيوب ونمت الارصدة فى البنوك وربنا يزيد حرام حلال مش مهم عندكم واعلموا انه اذا غضب الله على قوم رزقهم من حرام واذا اشتد غضبه بارك لهم فيه
احذوا حذوا حزب حماة الوطن اللى قرر توجيه كل مصروفات الدعاية الانتخابية لمرشحية لصالح مشروعات فى البلاد اتعلموا واستفيدوا من الاخرين وكفاكم فزلكة وفشخرة وقنعرة وقلة قيمة واعلموا ان الناس العامة بينظروا لكم بقمة الاحتقار مهما كان روعة سرادقتكم وجمال ازيائكم وهيافة احتفالاتكم
ارحموا الناس وقدروا ظروف الناس ولا تكذبوا على الناس ولا تنسوا ان تضحكوا فى الصور علشان الصورة تطلع حلوه وصوتى ياللى مانتيش غرمانه
قال انتخابات قال ولا عزاء لشعب مصر الفقير الغلبان
مش كده ولا ايه
