عبثا حاولت إقناع زوجتي بأن كيلو البطاطس الذي دخلت به عليها هو من مصدر حلال مائة في المائة حيث رفضت عمل صينية البطاطس وقامت بتحريز المضبوطات وبدأت التحقيق معي كما لو كانت وكيل نيابة يحقق مع متهم في قضية كبري بعد ضبطه متلبسا بالصوت والصورة!
– ممكن تقولي بصراحة مصدر البطاطس دي منين؟
– من الخضري طبعا حاتكون منين من الحلواني مثلا ؟
– بلاش لف ودوران انت عارف قصدي من السؤال كويس جبت الفلوس منين وبصراحة شديدة علشان لو فيه حاجة نقدر نعملها نلحق الموضوع قبل ما نتفضح، اسمع خد الغويشتين دول بيعهم وإلحق سدد الفلوس إللي اختلستها!
– معقولة يعني تشكي فيا بعد العمر الطويل ده، ثم فلوس إيه إللي هاكون اختلستها هو أنا صراف مثلا ولا أمين خزنة ولا مدير مشتريات تحت إيدي فلوس مانتي عارفة البير وغطاه وقرشين المرتب زي ماباخدهم باسلمهوملك، الله يخرب بيت الأفلام العربي يا شيخة إللي لحست دماغك.
– أفلام إيه يا راجل انت هو أنا قلت إيه غلط، مش يمكن ضعفت، إحنا بشر، .إوعي يا راجل إحنا نصبر علي عدم أكل البطاطس لكن مانصبرش علي النار!
– طب أحلفلك بإيه إن البطاطس مش من فلوس اختلستها؟
– تبقي أكيد رشوة، إنت ماتعرفش إن الراشي والمرتشي في النار؟
– لا حول ولا قوة إلا بالله رشوة إيه بس الله يسامحك هو انتي فاكراني رئيس حي ولا حتي مهندس تنظيم علشان أرتشي؟ حد الله بيني وبين الحرام ربنا يغنينا بالحلال.
– مش معقول عايزني أصدق إنك قدرت تجيب البطاطس دي وإحنا في آواخر الشهر تكونش قبضت الجمعية إللي عايزين نجهز بيها البنات من ورايا وفرتكتها في السوق؟
– لا ياستي اطمني فلوس الجمعية أنا لسه ماقبضتهاش.
– يبقي أخدت القرشين إللي شايلاهم علشان أحج بيهم السنة دي، يا راجل حرام عليك أنا ما صدقت أحوش للحج تقوم تبعزقهم علي الفشخرة الكدابة دي؟
– لا طبعا انتي عارفاني لا يمكن أمد إيدي علي بطاطس الحج قصدي علي فلوس الحج الله يسامحك لخبطتيني.
– طب ما هو لازم يكون فيه تفسير منطقي للي إنت عملته ده ولا تحب اتصل بالأرقام إللي حاطاها الحكومة علشان أبلغ عليك كواحد من مافيا البطاطس؟!
– بصراحة كده أخدت سلفة من مكافأة نهاية الخدمة قلت نشبرق علي نفسنا شوية، يعني هو الحق عليا إللي قلت أفرحكم وأدخل عليكم بالمفاجأة دي علشان تعمليلنا صينية البطاطس إللي بنحلم بيها من فترة؟
– انت عارف الجيران ممكن يقولوا علينا إيه لوعرفوا إننا عاملين صينية بطاطس؟
– اشمعني إحنا ماقلناش عليهم حاجة لما اشتروا شاليه في الساحل؟
– وإيش جاب لجاب؟ بقي يا راجل عايز تقارن حتة شاليه في الساحل بكيلو بطاطس حتة واحدة وكمان طبيخ مش تحمير.
– خلاص يا ستي بلاها الصينية واديني البطاطس أرجعها للخضري ويا دار ما دخلك بطاطس.
– دي توديها البنك تعملها وديعة وترجع نكمل كلامنا.
– أنا خلاص معنديش كلام تاني.
– حاتصوم عن الكلام يعني؟
– لا بس حاطبق الحكمة الشهيرة: إذا كان الكلام من فضة فالسكوت من «بطاطس»!
