عادل موسى يكتب.. قافل تليفونك ليه

قافل تليفونك ليه..

أرجوك افتح تليفونك..

وان كنت مشغول والا حاجة..

الله يكون في عونك..

عاذرك وعارف مشاغلك كتير..

بس مهما كانت ظروفك..

ما كنتش بتتأخر عن اخوك الكبير..

بالذمة طيب والضمير

قافل تليفونك ليه؟

…

رنيت عليك ياما

ليه ما بتردش عليا ؟

يا ابني محتاجلك ضروري..

عايز احكي معاك شوية..

عايز اسمع صوتك الحلو بوداني

مفيش في الدنيا شئ يغنيني عنك..

مفيش من بعد صوتك أي شئ تاني..

واللهِ مشتاقلك..

وشوقي عامل ومسوي فيا..

وانت عارف قد ايه حبك في قلبي..

رد ما تزودش غلبي..

رد بس وخد عينيه..

انت لو رديت ثواني.. عايز اعرف فيها ايه..

يا ابني ريح قلب اخوك..

قافل تليفونك ليه؟

…

جربت أرقامك بحالها..

ومنهم الرقم القديم..

ما اعرفش عيب في الشبكة..

والا تليفوني أنا..

ما بقاش سليم..

رد عشان عايزك في حاجة..

واديني معاد نتقابل فيه..

قلبي البردان في بعادك..

صورتك لما هنتقابل..

والله أكيد ها تدفيه..

طب لحظة هارن عليك تاني..

برضك مش راضي ترد ؟..

طب حد يقولي أنا أعمل ايه..

طب رد عشان خاطر اخوك..

رد ومش هارغي كتير..

أرجوك.. أرجوك.

..

مش هازهق م الرن عليك..

رد عليا وكلمني..

و هاشوفك فين.. وأجيك..

والله واحشني يانور عيني..

وواحشني كلامك وسلامك..

والطيبة الصافية اللي في قلبك وعينيك..

باللهِ عليك رد عليا..

الله يخليك..