– ياولية سيبي التليفون من إيدك شوية مش معقول كده هو الحق عليا يعني إللي جبتلك تليفون ذكي؟
– وهو الواد ذكي إللي شغال عندك في المحل رجع في كلامه وعايز تليفونه ولا إيه ياسي السيد؟
– الله يخرب بيت الجهل ياشيخة تليفون ذكي يعني تاتش زي اللي في إيدك ده تقدري تدخلي علي مواقع وتعرفي الدنيا فيها إيه وكمان تقدري تنزلي أي أبليكشن عليه.
– فكرتني صحيح ياسي السيد الأباليك إللي في الصالة ياخويا بايظين أديلهم شهر مش تحن عليا بقي وتجيب كهربائي في يدك يصلحهم؟
– اللهم طولك ياروح ياولية أقولك أبليكشن تقوليلي أباليك
– مالك بس ياسي السيد هو فيه حاجة ناقصاك؟
– كل وقتك كده علي التليفون بتعملي إيه كل ده؟
– ماهو الواد كمال كتر خيره نزلي الأباليك اللي بتقول عليها دي ياسي السيد وبقي دلوقتي عندي عقبال أملتك فيس لوك وطويطر وواتس ام كمان؟
– ههههههه الله يحظك يا أمينة اسمها فيس بوك وتويتر وواتس اب ياجاهلة.
– إنت تقول واتس أب ياخويا عشان انت راجل لكن انا واحدة ست يبقي واتس ام !.
– ده إيه برميل المفهومية اللي انا عايش معاه ده بس ياربي، وعلي كده بقي الواد فهمي وياسين يبقي واتس ابن والبت خديجة والبت عيشة واتس بنت؟.
– اسم الله علي مقامك ما اديك فاهم كل حاجة أهو ياخويا،ها قولي بقي حساباتك ايه علي الفيس لوك وأنهو رقم في تليفوناتك؟
إللي عليه واتس ابوك ؟
– طب هو كمال بسلامته مش يعلمك الأول ولا يحطلك حاجات انتي مش فاهماها وخلاص؟
– يعني بتتمهزأ بيا بدال ما تعملي يد علي الفيس؟
– اسمها آد ياولية يعني إضافة بس بالانجليزي وبعدين بلاش أنا ادخل عليكي في الفيس لأننا مش حانعمر مع بعض وممكن يومين تلاتة بالكتير واعملك بلوك!
– يعني إيه بلك ده ياسي السيد مش ده الزفت إللي بيرصفوا بيه الشوارع؟
– شوارع إيه وزفت إيه علي دماغك..البلوك ده يعني أحذفك من قايمة الأصدقاء عندي!
– يعني زي ما الحكومة كده حذفتنا من بطاقات التموين؟
– أيوه تمام كده!
– بس أنا لسه شايفة حد علي فيسي ياسي السيد بيقول اننا مش احنا لوحدنا إللي اتعملنا بلوك من التموين لا وكمان رئيس الوزارة بذات نفسه والوزرا كلهم اتبلكوا من التموين.
– ماسمهاش فيسي يا أمينة اسمها الأكاونت بتاعي إلا صحيح انتي مسمية نفسك إيه علي الفيس يا امينة؟
– عذراء الربيع ياخويا وحاطة صورة سعاد حسني!
– يانهار اسود لهو انتي عذراء الربيع؟
– أيوه أنا إللي عمال تعاكس فيها علي المازينجر ليل نهار وأنا مش معبراك؟
– اسمه ماسينجر ياجاهلة!
– أيوه أيوه غير الموضوع.
– طب لمي هدومك وعلي امك يا أمينة.
– احسن هو أنا يعني شوفت معاك يوم عدل..عموما إعمل حسابك أنا ماشية ومش راجعة تاني!
– يعني إيه يا أمينة مش فاهم ؟
– يعني بكرة الصبح تبعتلي ورقة البلوك بتاعتي!
