من وقت وقوع سفاح المعمورة والتايم لاين منقسم جزئين جزء بيحذر من المحامين وجزء بيحذر من برج العقرب وانا الحمدلله الاتنين محاميه وبرج العقرب لكن مش هو ده اللى استوقفنى اللى استوقفنى ان فى جزء تالت من الناس سايب موضوع المحامين وبرج العقرب وماسك فى موضوع ان الاكونت بتاعته على الفيسبوك كله ادعية وقرءان وحكم ومواعظ … وبيروج لفكرة ان كل الوحشين او اللى لا يتقوا الله كده ! السفاح وخالك اللى اكل ورث امك ومديرك المرتشى وصاحبك العصفورة وكل الناس اللى اتسببوا فى اذيتك بتدخل صفحاتهم فتلاقى حكم ومواعظ وادعية
.
وبما انى محامية وعشقت دراسة القانون حابه اقول اننا درسنا فى مادة (علم الاجرام) ان المجرمين انواع ذكرت فى نظريات لعلماء زى لمبروزو بالتفاصيل ولكن انا هختصر . المجرمين منهم المجرم بالفطرة والمجرم بالوراثه والمجرم بالعادة والمجرم بالصدفة والمجرم العاطفى
اما السفاحون غالبآ ما يكونون المجرمون المتمرنون الذين يقبلون على جرائمهم من دون حاجة الى محرك معاصر سواء أكان عاطفياً أو ظرفياً فهم يتسمون بالخبث المرضى أو بالانعدام الجذري للأخلاق وغيرها من الصفات التي تقوم الدوافع الغريزية لديهم .

انا ليه بذكر جزء من مادة علمية درستها علشان أوضح نقطة مهمه اوى وهى ان هذه النوعية من المجرمين متمرنون وخبثاء وجزء من خبثهم انهم بيتدارو وبيحتموا خلف هذه الخلفيه الدينيه التى تتسم بالورع والزهد وحب الخير للناس
بمعنى أنهم مش متدينين هما بيتخذوا الدين درع يحتموا فيه بينتحل شخصيه المتدين كنوع من الحصانه والتخفى وعواقب هذا الأمر على المجتمع خطيرة وهى ان البعض ممكن يفقد الثقه ف كل متدين او يلجاء ل فئه بعيدة كل البعد عن الرشد والصواب ويستقى منها مبادئه وده لانه فقد الثقه فى الفئه المتدينة بسبب الفئه تختفى وراء قشور التدين واختلط عليه الأمر
والموضوع كله انتحال صفه فقط مجرد انتحال صفة المتدين العاقل … لا تخافوا ولكن احذروا.