انا او احنا داعمين للدوله انت مين واحنا مين بالظبط واى دولة تدعمون جملة او كلمة سمعناها اول مرة وقولنا نفوتها المرة دى لكن تصبح سلام جمهورى فى كل خطبة وفى كل مؤتمر ولاى حد يقولها كده بلا ضوابط ولا روابط ولا مراعاة لشعور الناس والغلابة المطحونين اصبحت تقليد اعمى احنا بندعم الدولة وانا بدعم الدولة
لما انتم اللى بتدعموا الدولة وقد اصبحتم مليونيرات من مفيش وتمتلكوا افخم انواع الفيلات والقصور من مفيش لما تركبوا اسطول سيارات من اغلى انواع السيارات من مفيش لما تشترى حضرتك لكل ولد من ولادك الاثنين سيارة بستة مليون جنية للواحدة من مفيش لما تترشحوا وتدفعوا الملايين علشان القوائم او ملايين الدعاية والضحك على الناس منين هو دة تدعيمكم كلكم للدولة والوقوف مع الدولة فى ازمتها
معلش ياعم مصطفى يامكوجى ولا تزعل ياعم سطوحى ياحلاق ومتخدش على خاطرك ياعم نصحى ياسباك واوعى حد من الفلاحين الكادحين يزعل زعلكم غالى علينا اوعى ياموظف يابو مليم تضايق لا ييجى لك ضغط وسكر وياحرام العمال بتبكى على مصانعهم اللى راحت لا بلاش بكاء دموعكم غالية علينا متزعلوش منهم بيتكلموا كلام انتخابات ولفت انتباة هم اللى بيدعموا الدولة وانتم واحنا اللى بنسرقها وننهبها وبنعمل نفسنا رجال اعمال امال ايه ما الحال اتشقلب متزعلوش والنبى اسمعوا واعملوا ودن من طين وودن من عجين
كلنا عارفين والرئيس عارف مين بيدعم الدولة ومين اللى بيسرقها عارف اللى بيدعم الدولة المواطن الغلبان ابن مصر الحقيقى اللى دفع من عيشته وحياتة ثمن الاصلاح الاقتصادى وتحمل ومازال صابر اللى بيتعالج فى التامين الصحى وياريت عارف او قادر اللى بيتشعبط فى المواصلات الغير ادمية اللى بيجيب رغيف العيش لاولاده بالعافية اللى بيدفع من دم قلبة مصاريف المدارس والدروس اللى بينام بيبكى ويصحى بيعيط من كلمة عايز يابا عايز يابا مفيش يابنى هم دول اللى بيدعموا مصر وبيحافظوا عليها ومستعدين يضحوا من اجلها بكل غالى ورخيص مش انتم يا اصحاب القصور والفيلات وراكبى افخم السيارات وبتتعالجو فى احسن المستشفيات اللهم لا حسد والله ربنا يزيدكم كمان وكمان بس والنبى بلاش نغمة احنا بندعم الدولة ارحمونا مش هيبقى موت وخراب ديار وخاصة احنا عارفين جبتم فلوسكم منين من قلب ومص دم مصر عيب اذا بليتم فاستتروا وبلاش نسمع الكلمة دى تانى يعنى تخرسوا من الاخر كده
مش كده ولا ايه
