لا بيجى الكلام بالغصب ولايمشى بلوى دراع
ولا ينفع معاه النصب ولا له شلة أو أتباع
ولا بيتباع علي الناصية ..ولا بينصاع..
ولا بيطاطي غير للصدق….حتى ان جاع
فانا مش لاقي كلماتي…على الطرقات
ولا عاوز لها توقيع علي استمارات
ولا هاحصل علي امتيازات
وعبتواب مهوش عضو ف قيادة الثورة
ولا واحد من الظباط
أنا شاهد… ووالله لاقول الحق مهما كان
انا شوفته بيتسامح..بيتنازل وشوفت البسمةعلي وشه ف ساعة الغيظ
وساعة الضحك…حد لذيذ
وشوفته بيجتهد ف الخير
وبيلم الحبوب للطير……بقلب عزيز
وبيوزع ساعات راحة علي المجاريح
وبيقول للعيال تواشيح…
وساعة الجد كان إنسان
وساعة الرزق كان فلاح
ولما اشتد طبع الكدب.. سب سجاح
وقال للأعور انت اعور ..عشان يرتاح
وشوفته يا حضرة القاضى ف عز الحر بينادى
فلانة عاوزه توب ياولاد
وشوفته ف طوبة بيغطى اليتامى بزاد
وشوفته بينأى ببلدنا عن الحساد
وشوفت عصابة م الأبرار
وبيلموا الساعات ليلا… ويبنوا نهار
وشوفت تلامذة بيغنوه
وناس مرضى بيستنوه.. عشان ف عيونه ميه وزاد
وبيواسى…ومرة سألته عن اسمه وكان ناسى
وعايش منقطع للناس
ولا بيهمه مين يسخر ولا ف دماغه مين اغتاب
وماشى ف وشه بيدور علي أغراب
يسكنهم ف أحلامه….ويستر عرضهم ورا باب
ودا بعض اللي انا شوفته
من الماثل فى قفص الحب عبتواب
