جريدة الاخبارية سياسية::شاملة::مستقلة
مقالات مشابهة
طبّـل يـا خــويـا … ورقصـها
شغـل الغـوازي اللي نـاقصها
ما الحلوة باعت مقاصيصها
وايـامـهـا بـالأحـزان … حبـلى !
طبـل وحط الدّوم ع التك
قاصـد خـرابها .. المتأنتِـك
عمّـال يبعـزق … ويفـرتـك
والخـلق طهقـت مش قـابلة !
طبــل ورقصنـا يـا ريّـس
ما غلبت احايل وأسيّس
م اللـي جـرى لنـا بنهيّس
والدنيـا ضـاقت كيـف دبـلة !
طبــل ورقـص .. باشـواتها
وابسط كبارها اللي شوتها
في الـدم تبلـغ …. نشواتها
دول مهبـولين في ايـام هبلة !
طبّـل ورقصـهـا .. يـا بـاشـا
لو حتى .. كارهة ما حبـاشا
مش نزلـوا غيطـها الهبّـاشة ؟
مـا تـزغـردوا لهـم .. يـا تنـابـلة !
مـا البيـر فضي وهـو بـان قعـره
والشعــب بيـشـد … ف شعـــره
مجروح في قوته وفي مشاعره
والحـابـلة .. تـاهـت .. في النـابـلة !
طبّــل ورقصـهـا … يـا اخــونـا
بعد المخـاض .. جـاتها سخونة
خدها البعيد … قال على خونة
صبّـحـهــا … كـالــزهــرة الـذابـلة !
طبّــل .. وورّق … ع المقســوم
يا ابـو ضهـر م الاحزان مقسوم
طب نعمـل ايه ؟ وعد ومقسوم
شـــوم العنـــاتـــر …. بــاع عبــلة !
ــــــــــــــــــــــــــــــــــــــــــــــــــــ
