– مالك يا أمينة سايقة العوج بقالك كام يوم؟
– ملكش دعوة بيا ياسي السيد سيبنى فى حالى دلوقتى أحسنلك!
– والله عال عال ده إيه اللهجة اللى بتتكلمى بيها دى؟
– هو كده وإن كان عاجبك ومن هنا ورايح معنديش لهجة تانية!
– طب بس فهمينى ليه ده كله؟
– وكمان عامل نفسك مش عارف..ده انا حبيت على يدك ياسي السيد عشان تودينى أروح أتفرج على الست الأمريكانية شينيفر عزيز!
– هههههههه الله يحظك يا أمينة اسمها جينيفر لوبيز ياولية
– طبعا ماانت طول عمرك مع العوالم وعندك خبرة لكن أنا مرمية فى البيت وحتى الدش محرمة عليا ياخويا؟
– ياولية أولا الست جينيفر لوبيز ماهياش عالمة دى مطربة قد الدنيا ثانيا أنا باخاف علكى من الحاجات دى وثالثا بقى ومقام سيدنا الحسين أنا مليش بركة إلا انتى.
– ولما هو كده يعنى كان حرام تعملى حاجة بحبها ؟
– مش حكاية حرام ولا حلال لكن انتى عارفة تذكرة الحفلة دى بكام دى بتلاتلاف للعادى وبخمسة لل”فى آى بي”يعنى للناس المهمين وأظنك ماترضيش سي السيد وحرمه يقعدوا مع الناس العاديين.
– مستخسر فيا تلات ولا خمستلاف جنيه ياخى اعتبرها مكافأة نهاية الخدمة بعد العمر ده كله ليا وانا تحت رجليك انت وعيالك!
– ياريتها على الفلوس وبس يا امينة،خدى عندك كمان الحفلة معمولها “دريس كود”!
– ويطلع ايه الضرس المنكوب ده ياسي السيد؟!
– ضرس إيه ياجاهلة دريس يعنى فستان ودريس كود يعنى لازم كل اللى يحضر الحفلة يلبس لون واحد انتى ماشوفتيش الوزيرات بتوعنا وهم زى العرايس فى الحفلة بالفساتين البيضا وكمان الرجالة لازم يلبسوا أبيض!
– دى مقدور عليها واهو فستان فرحنا كان نفع!
– نفع ازاى ياولية وانتى كل ماتعوزى حتة قماشة بيضة تنضفى بيها المطبخ بتقطعى منه ثم لو انتى فستانك كويس أنا حاروح إزاى؟
– يوه ياسي السيد هو انت عندك أكتر من الجلاليب البيضا ياخويا؟
– عايزانى أروح حفلة جينيفر لوبيز بجلابية يا أمينة واضح إنك كبرتى وخرفتى وملكيش خروج أساسا من البيت ,بقى عايزانى ألبس جلابية فى حفلة زى دى؟طب زبيدة وجليلة لو شافونى يقولوا عليا إيه، سي السيد اتجنن خلاص؟!.
– كل اللى يهمك زبيدة وجليلة وانا ولا كأنى موجودة فى حياتك..حتى حفلة الباروما بتاعة كمال ابنى حرمتنى اروحها زى كل امهات صحابه.
– بارومة لما تاكل نافوخك اسمها بروم ياولية بروم!
– وتطلع إيه البروم دى ياسى السيد؟
– يعنى حفلة التخرج من المدرسة.
– عقبالى يارب ماتعملى حفلة..انا لو كنت طلعت مغناواتيه كنت قعدت لوميز بتاعتك دى فى البيت لكن ناس ليها بخت وناس ليها سي السيد!
– بتبرطمى بتقولى إيه يا أمينة؟
– ولا حاجة باقول نفسي مرة تعملى حاجة اطلبها منك.
– خلاص اطلبى حاجة معقولة وانا اعملهالك.
– عايزة قصر أو حتى فيلا زغننة فى العلمين, نفسي أشوف الدنيا بقى ياسي السيد زى بقية الخلق.
– لا أنا بقى حاخدلك مطرح بجنينة تشوفى منه الجنة بذات نفسها!
– فى العلمين ياسي السيد؟
– لا فى المجاورين يا أمينة وأهي فرصة أعملك فيها حفلة بروم من الدنيا كلها!
